Pingajussaanik: Nunatta Eqqumiitsuliaanik Saqqummersitsivia allamut nuulerpoq
Nunatta Eqqumiitsuliaanik Saqqummersitsivia siullermik Tuapannguanut inissinneqassasoq aalajangerneqarpoq. Kommuneqarfik Sermersuumiilli siorna pilersaarusiaminnik saqqummiussaanni aalajangerneqarpoq, Naluttarfiup Maliup issittumi arsaattarfissuassap eqqaanut inissisimaffissaa nuunneqassasoq.
Nunatta Eqqumiitsuliaanik Saqqummersitsiviata aningaasaateqarfiata siulersuisui isuamaqarput Nunatta Eqqumiitsuliaanik Saqqummersitsivia mittarfiup, aqquserngit ikuallaaviullu eqqaani inissinneqassanngitsoq.
Siullertut inissaq annikippallaarpoq innaannarsuullu sivingasup saarpiaani, biilinik bussinillu millionilikkaanik saneqquaffiusumiilluni.
Josef Motzfeldt (siulittaasoq)
Eqqumiitsuliortoq, Aka Høegh (siulittaasup tullia),
Professor, Minik Rosing
Borgmester, Asii Chemnitz Narup
Kristine Spore Kreutzmann (KIMIK)
Eqqumiitsuliortoq, Bjørn Nørgaard
Katersugaasiviup pisortaa, Lars Kærulf Møller
Naalakkersuisoqarfimmi pisortaq, Lone Nukaaraq Møller.
AAMMA ATUARUK Issittumi arsaattarfissuassaq tusaamasamit titartarneqassasoq
Nunatta Eqqumiitsuliaanik Saqqummersitsiviata siulittaasua, Josef Tuusi Motzfeldt nassuiaavoq.
Aammattaaq innaannarsuup akisuatitsissanera ilanngullugu oqaatigaa, kiisalu Nuummi arsaattarfissuassap tallisarneqarsinnaaneranik Sikuki Habourillu allinissaanut pilersaarutit kranerpassuaqalernermik kinguneqartussaasoq, siulersuisuni eqqarsaatigisimavaat.
Siulersuisut Nunatta Eqqumiitsuliaanik Saqqummersitsivia Nuummi Tele-Post allaffiata tunuanut C. E. Janssenip aqqutaanut nuunnissaa siunnersuutigaat.
Innuttaasunit iluarineqarpoq.
-Inissisimaffik eqqissisimasoq ilaqutariit, ilinniartut atuartullu eqqumiitsuliornermik nuannarisallit eqqissillutik angalaarfigisinnaasaat.
AAMMA ATUARUK Nunatta eqqumiitsulianik saqqummersitsiveqalernissaa qanilliallattoq
Nunatta Eqqumiitsuliaanik Saqqummersitsiviata siulittaasua naapertorlugu Kommuneqarfik Sermersuup inissisimaffik iluaraat.
- Inissisimaffimmik pitsavimmik siunnersuuteqarpugut tamannalu kommunilu piviusunngortitseqataarusupput.
Nunatta Eqqumiitsuliaanik Saqqummersitsiviata siulittaasua, Josef Tuusi Motzfeldt taama oqarpoq.
Kommunep ukiup affaata missaa atorlugu, inissisimaffissaq nutaaq aallaavigalugu pilersaarusiussasut, Josef Motzfeldt naliliivoq .
- Imaappoq ukiaru inissisimaffik siunnersuuterput pitsavik aalajangiiffigineqarsimanissaa naatsorsuutigisinnaavarput.
