Nunatta eqqartuussisuunera illersuisunit nersorneqartoq

Nunatta eqqartuussisuunera Søren Søndergård Hansen sivikitsumik napparsimareerluni 60-nnarnik ukioqarluni toquvoq. Taassuma eqqartuussiveqarnerup iluani pingaaruteqarsimanera Peqatigiiffik Illersuisut oqariartuutigaat.
Allattoq Karsten Sommer
aggustip 23-at 2017 11:02

- Aliatsaatigisatsinnik aammalu tupaallaatigeqisatsinnik tusarparput Suulut Søndergaard Hansen-i akornatsinnikkunnaartoq, Peqatigiiffik Illersuisut misiginneqatigissummik taama allagaqarput.

- Suulup qimagunneratigut, eqqartuussiviit inummik pingaarutilimmiinnaanngitsoq aammali ilisimasaqarluaannarani eqqartuussiviit isummannaatsumik naapertuuttumillu sorsuutiginnittut pingaarnersaat annaavarput.

Suulup ukiorpassuarni eqqartuussivinni sulinera Kalaallit Nunaanni eqqartuussiveqarnermut pingaaruteqarsimaqaaq. Tamannalu imaasiallaannaq taarserneqarsinnaanngilaq. 

- Kialluunniit nalunngilaa, Suulut ilakkuminartuusoq aammalu qungujukkumatuujusoq. 

Nunatta eqqartuussisuunera 60-leeqqammerpoq, nunatsinnilu eqqartuussiveqarnikkut suliniuteqarluarsimasuuvoq.

Eqqartuussiveqarnermut ataatsimiititaliami nunatsinni eqqartuussiveqarnikkut nutarterisoqarmat ukiuni qulini suleqataavoq.
Søren Søndergård Hansen, nersornaammik nuimasumik ridderkorsimik 1. grad af Dannebrogsordenimik 2011-mi saqqarmiulerneqarpoq.

AAMMA ATUARUK Nunap eqqartuussisuunera sivikitsumik napparsimareerluni toquvoq