Nunatta avannaani qaqqamik sisoortoqarnerani pinartumik navianaateqanngitsoq
Alapernaarsuinermi Umiammakku Nunaanni Kangerluarsummilu – Uummannap avannaatungaani - piffissami qanittumi qaqqat nakkutigineqartut annertummik sisoorfiusinnaanerat, kingunerisaanillu navianaatilimmik Uummannap Sulluani inoqarfinni tassaartoqarsinnaaneranik takussutissaqartinneqanngilaq.
Tamanna pissutsinik naliliinermi nutaami, Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfiup saqqummersitaani allaqqavoq.
Nunap assingani ilusiliussani aappalutumik nalunaarsorneqarsimasuni qanittuaniinnissaq innersuussutigineqanngilaq, taamak Naalakkersuisoqarfik tusagassiutinut nalunaarummi paasissutissiiput.
Sumiiffiit alapernaarsugaasut suli nikikkiartortut takussutissaqarput.
Umiammakku Nunaannit silasiorfiup silaannaap kissassusaata -13 °C -ip +10 °C-llu akornanni qaammatit kingulliit nalunaarsorpaa. Qerinnanngiffianilu ujaqqat nakkaakulaarnerusarsimanerat maluginiarneqarpoq. Silap kiatsikkiartornera ilutigalugu sisujartorfinni nikittarnerit annertusisinnaasut ilimagineqarsinnaavoq.
Kangerluarsuk Kangillermi qaqqami nikinnerit sukkatsiallannerat GPS-ikkut nalunaarsuinerup takutippaa, tamannalu ukiup taamaalinerani nalinginnaasuuvoq.
Sissuernissaq
Sivinganermi immap killinganut qanittumi “Kangerluarsuk Killeq”-mi nikikkiartuaarnerit ingerlaavartut kiisalu akulikitsumik ujaqqat nakkaasarnerat nalunaarsorneqarput. Tassani sivinganerup nunataata qaarsuatalu sisujartortup ilivitsuunerulluni ataatsikkut sumiiffimmiit kangerlummut sisoorsinnaanera ilimagineqarsinnaavoq. Taamatulli pisoqarneratigut inoqarfinnut navianaateqarnissaa ilimagineqanngilaq, kisianni Kangerluarsuup nalaani tassaarneq qanittuinnarmi pisinnaavoq.
Ernummatissaqanngilatit kisianni kangerlunni qaqqalluunniit sivingarngisigut umiatsiamik ingerlaassaguit, sissuernissat sumiiffinnilu nalunaaqutsikkani mianersoqqussutit ataqqinissaat pingaaruteqarpoq.
