Taamaatitseqattaarnerit kingorna: Upernavimmut timmisartuussisoqaqqilersoq
Upernavimmut pissutsit piffissami kingullermi nuannersuunngillat – akerlinganilli.
Upernavimmi nunaqarfinnilu qanittuaniittuni timmisartukkut angallanneq taamaatitseqattaarfiullunilu kinguaattooqattaarfiuvoq. Tamanna teknikkikkut ajutoornernik silallu ajorneranik pissuteqarpoq.
Innuttaasut pakatsisimasut kingunerluuteqarfiupput. Napparsimasut nakorsamukarsinnaanngillat, pikkorissartut ataatsimiittussallu piffissaq eqqorlugu takkussinnaanngillat aamma poortukkat allakkallu suli tikiunneqanngillat.
Air Greenlandilli Upernavimmiup eqqaani ilaasussanik assartuineq sapaatip akunnerata tullianit aallartinneqaqqissasoq neriorsuutigaa.
- Taamaatitsinerit pingaartumik silap qanoq inneranik pissuteqarput, aammali qulimiguullip Upernaviup qanittuani atorneqartartup piffissami kingullermi teknikkikkut ajornartorsiuteqarneranik pissuteqarlutik. Pissutsit ajuusaarnartorujussuupput, ingerlatsinermulli immikkoortortaqarfipput ullut tamaasa nalilersuisarput, Piujuartitsinermut attaveqaqatigiinnermullu pisortaq Inga Dora G. Markussen oqarpoq.
Ilaasussarpassuit aallarneq ajuleqqasut
Qulimiguulik teknikkikkut maanna misissorneqaleruttorpoq. Qulimiguuliullu sapaatip akunnerata tulliata aallartinnerani atorneqaqqissinnaalernissaa Air Greenlandip naatsorsuutigaa.
- Angallassisussamik taamaatitsiinnartoqaraangat ilaasussat aallarneq ajuleqqasut utaqqisuni ajoraluartumik amerliartulersarput. Angalasussat angalanissamut pilersaarummik pissarsiffigisimasaatigut allannguutit pillugit paasissutissiiffigisarpagut, tassa e-mailikkut, SMS-ikkut imaluunniit angalanissamut inniminniiffiusoq assersuutigalugu napparsimavik aqqutigalugit, Inga Dora G. Markussen oqarpoq.
Qaanaamut Upernavimmullu ukioq manna qaammatini pingasuni siullerni timmisartukkut angallassinissamut pilersaarutaasunit 326-t silap ajornera imaluunniit teknikkikkut ajutooqqaneq pissutigalugit taamaatinneqarsimapput.
