Nuummi nunanut tamalaanut mittarfik nutaaq kinguaattoorfiungaatsiartoq

Nuummi nunanut tamalaanut mittarfik siorna novembarimi ammartoq kinguaattoorfiungaatsiarpoq.

Jyllands-Posten taama allaaserisaqarpoq.

Air Greenlandip timmisartuussinerisa sinnerinut sanilliullugu Nuuk aqqusaarlugu angalasussat agguaqatigiissillugu 3,5-eriaammik kinguaattoornerusarput.

Timmisartuutileqatigiiffimmi pisortaanerup, Jacob Nitter Sørensenip "tamanna angallassinermut sunniuteqangaatsiarnerarpaa", tamannalu timmisartuutileqatigiiffimmut ilungersuatitsivoq.

- Pitsaanerusinnaavoq, aamma pitsaanerulissaaq, taanna tusagassiorfimmut oqarpoq.

Anorimit silamillu eqqugaangaatsiartoq

Nuummi mittarfik Kangerlussuarmi mittarfimmit anorlernerusarlunilu silap ajornerusarnera kinguaattoornernut pissutaasut ilagaat.

Jacob Nitter Sørensenillu mittarfimmi teknologiimik aaqqiissutit nutaat timmisartunut silaluunniit ajoraluaraangat missinnaatitsissapput.

Taassuma timmisartuutileqatigiiffik "ungasinngitsumi" ”nalinginnaasupajaamik amerlassuseqartunik kinguaattoortoqartalernissaa” naatsorsuutigaa.

Periutsit nutaat

Pisortaanerup oqarnera naapertorlugu sulisut periutsinik nutaanik ilinniaqqaarnissaat aamma pissutaaqataavoq.

Mittarfik sanaartornermi 2 milliardit koruunit sinnerlugit aningaasartuutigineqarsimasoq siorna novembarip 28-ani ammarpoq. Sanaartorneq 2019-imi aallartinneqarpoq, sanaartornermilu 2 milliardit koruunit sinnerlugit aningaasartuuteqarneq nunatta oqaluttuarisaanerani aningaasaliissuteqarnerni annerpaajulluni.

Danskit naalagaaffiat mittarfimmik nutaamik 33 procentimik piginneqataassuteqarpoq, Namminersorlutik Oqartussallu timmisartuutileqatigiiffik Greenland Airports aqqutigalugu piginneqataassutsip sinneranik piginnittuullutik. 

Ilulissani nunanut tamalaanut mittarfik nutaaq aappaagu aamma ammassaaq.