Ikiuiniaqatigiiffik isornartorsiorneqartoq Gazami agguaaqqinnissaminut unitsinneqarpoq
Gaza Humanitarian Foundation (GHF) USA-mit Israelimillu tapersersorneqartoq, ikiuiniaqatigiiffiit tamarmik matuneqarsimanerinik tallimanngormat nalunaarpoq.
Nutaarsiassaqartitsivik Reuters taama allappoq.
Ulloq ammaqqiffissaq kingusinnerusukkut nalunaarutigineqassaaq.
Gazamiut isumannaassusertik pissutigalugu ikiuniaqatigiiffinnut ornigutinnginnissaminnut kaammattorneqartut oqaatigineqarpoq.
Ikiuiniaqatigiiffiit eqqaanni aallaasersortoqarnerata kingunerisaanik ikiuiniaqatigiiffinni arlallit toqutaanerata kingorna ikiuiniaqatigiiffinni sulineq unitsinneqarpoq. Pingasunngornermi ikiuiniaqatigiiffiit aamma matuneqarput, sisamanngornermi sivikikkaluamik ammaqqinnginnerini.
Reuters naapertorlugu „palæstinamiorpaalussuit“ ulluni pingasuni tulleriiginnarni Gazap kujataani Rafah-imi agguaassiviup eqqaani aallaaneqarput.
Kaannersuaqalernissaa aarlerinartoq
Sakkutuut kalerrisaarummik igeriussisimanerinik Israelikkut sakkutuui sapaammi ataasinngornermilu nalunaaruteqarput. Palæstinamiunut sakkutuut tungaanut ingerlaartunut aallaasersortoqannginnerani kalerrisaarut siulleq igeriunneqarsimasoq, marlunngornermi sakkutooqarfik nalunaarpoq.
Gazami ikiuiniaqatigiiffiit nalinginnaasumik aaqqissuussaannik GHF avaqqutaarinerarlugu Naalagaaffiit Peqatigiinnit ikiuiniaqatigiinnillu allanit isornartorsiorneqarpoq.
Israelip Gazamik sapaatip-akunnerini aqqanilinni mattussinerata kingorna Gazamiut 2,3 millionit amerlanersaat kaannersuaqarnermit eqqugaariaannaanerinik Naalagaaffiit Peqatigiit mianersoqqusisareerput.
Sakkuaakkunnaarnerup qajannartup sunniutaarunnerata kingorna marsip 18-ianniilli Israelikkut Gazami saassusseqqilerput.
Nunarsuaq tamakkerlugu tatineqarneq pissutigalugu maajip 19-ianni Israel Naalagaaffiit Peqatigiit ikiuiniarluni aallartitaanut ikiuiniartoqaqqissinnaalersitsivoq.
Sapaatip-akunnera ataaseq qaangiummat kattuffik GHF ilisimaneqarpallaanngitsoq ikiuiniaqatigiiffiit nalinginnaasut aqqutiginagit ikiuiniarnermik aallartitsivoq.
/ritzau/Reuters
