Komuunini tamani sulisut akissarsinissaat kinguaattoortoq
Danmarkimi ippassaq sisamanngornermi inuiattut nalliuttorsiorneq peqqutigalugu bankit matoqqapput.
Tamannalu nunatsinni aningaaaserivissornermut sunniuteqarpoq. Tassami ilaatigut ullut 14-ikkaarlugit akissarsiallit aamma suliffissarsiortunut ikiorsiissutinik pisartagallit ullumikkut akissarsinngitsoorput.
Nunatsinni komuunit tamarmik taama nalunaarput.
- Malugeqquneqarput innuttaasunut akiliutigut tamarmik kingusinaarlutik apuuttussanngormata, sapaatit akunneratalu tulliani marlunngornermi imaluunniit pingasunngornermi aatsaat ikisussanngormata. Tamanna ullumi juunip tallimaani Danmarkimi inuiattut inatsisitaarfiusumik ullorsiorfiusartumi bankit matoqqammata, peqquteqarpoq.
Qeqqata Kommunia facebookimi quppernerminut ippassaq taama allappoq.
Bankit matoqqasussaasimaneri komuuninit nalunnginneqareertussaammat, akissarsititsinissaq iliuuseqarfigineqajaarsinnaagaluartoq, komuunit tamarmik facebookimi oqaaseqartarfiini inuit arlallit allapput.
Kommune Kujallermi Avannaata Kommuneanilu akissarsiat ullumi tallimanngornermi ullup ingerlanerani ikineqarnissaat sulissutigineqartoq, taakku facebookimi quppernerminni allapput.
Kommuneqarfik Sermersuumi juuni qulingani innuttaasut NemKontoannut tunniussineq pissasoq nalunaarutigaat.
Kommune Qeqertalimmi Qeqqata Kommunianilu akissarsiat juunip qulingani aqqarnaniluunniit ikineqassasut nalunaarutigineqarpoq.
