Erik Jensen: Demokraatit qinersisitik mitallerpaat

Demokraatit soraarnerussutisianik pinngitsaaliilluni ileqqaarisussaatitaaneq atorunnaassasoq qineqqusaarutigeriarlugu, Naalakkersuisunut siuttuullutik maanna toqqaannartumik suliassamittut isiginngilaat. Tamanna Naalakkersuisut Inatsisartunut ilaasortamut, Naleqqameersumut, Pele Brobergimut akissutaanni allaqqavoq.

Tamannalu naalakkersuisoqataasunut kissaammersitsivoq. Siumumit Inatsisartunut ilaasortap, tunuliaqutaaffigisani, tassa Demokraatit, qinersisiminnut mitalliisutut nalilerpai.

- Qineqqusaarutigeriarlugit taavalu illua-tungaatigut, taamatut neriorsueriarluni, ingerlaannaq atorunnaarsinnissaannik oqariartuuteqariarluni, taava allatut iliorneq taanna aamma imaannaanngitsorujussuuvoq. Qinersisartunik aamma mitalliinertutullusooq isikkoqarpoq, Erik Jensen KNR-imut oqarpoq.

Siulittaasoq neriorsuisoq

Demokraatit Naalakkersuisullu siulittaasuata, Jens-Frederik Nielsenip, qineqqusaarnermini oqaasii ilaatigut ima ipput:

- Pinngitsaaliilluni utoqqalinersianik katersisussaatitaaneq unitsissavarput, Jens-Frederik Nielsen upernaaq qineqqusaarummini oqarpoq.

Taama qineqqusaarnermi oqalunneq piviusorsioranilu inunnut tusaruminarsaaneriinnaasoq, Erik Jensen isumaqarpoq. Eqqunngitsunillu oqalunneq Demokraatit ajugaassutigigaat taanna isornartorsiuivoq.

- Inuit tusarusutaannik oqaluttut eqqunngitsumillu tunngavilersorlutik qineqqusaartut maannakkut siulittaasumik pilersitsiviusoq, taanna ajornartorsiut annertoorujussuartut isumaqarfigaarput. Qinersisartunik taamatut eqqunngitsunik tunngaveqarluni siuttunngorsimanertut oqaatigineqartariaqartoq isumaqarpugut,  Erik Jensen oqarpoq.

Naalakkersuisoqataaneq apeqquseraa

Erik Jensenip naliliilluni oqarnera naapertorlugu Demokraatit siuttunngornerminnut peqqutaat annerpaaq tassaagaluarpoq, soraarnerussutisiassanik pinngitsaaliilluni ileqqaartitaanerup atorunnaarsinnissaanik qineqqusaarnermi qinersisartunut neriorsuineq.

Tamannali maana pinngimmat partiip naalakkersuisoqataanera oqallisigisariaqalersoraa.

- Taamaattumik Siumumi nalilersugassaqarpugut ilumut tamanna attanneqaannassanersoq imaluunniit qanoq kinguneqartitsisoqassanersoq, Erik Jensen oqarpoq.

KNR-ip Siumup siulittaasua, Vivian Motzfeldt, Erik Jensenip isornartorsiutai Siumup partiitut aamma isornartorsiutiginerai pillugu saaffigaa. Taannali apersorneqaqqulluni ilanngutassiap suliarinerani tutsiutinngilaq. 

Naalakkersuisut siulittaasuata, Jens-Frederik Nielsenip, Erik Jensenip isornartorsiutai ilisarisinnaanngilai. KNR-ip Jens-Frederik Nielsen apersorpaa. Taanna kingusinnerusukkut saqqummissaaq.