Nunatta atuagaateqarfiani akeqanngitsunik aaqarnermi atortoqartuaannalissasoq

Nunatta atuagaateqarfiata naleqquttat tamponillu akeqanngitsumik pissarsiarineqarsinnaanissaannut marsimi misiliutitut aaqqissuussereerluni aaqqissuussinerup atuuttuaannarnissaa aalajangiuppaa. Aaqqissuussinermi arnat amerlanerusut atuakkanik atorniartarfimmiittalerneranik kinguneqartoq taakku nassuiaapput.

Allattoq Liv Almer

juunip 04-at 2023 10:32

Nuummi Nunatta Atuagaateqarfianiikkuit atuagaannarnik angerlaassinissat ilimanngilaq.

Atorniartarfiup aqutsisuisa Team Oplevelserini aqutsisoq peqatigalugu nalequttat tamponillu atuakkanik atorniartarfimmiittunut akeqanngitsumik pissarsiarineqarsinnaalernissaat marsimi aalajangerpaat.

Nunarsuarmi tamarmi arnat ulluata marsimi pisarnera tunngavigineqarpoq, USA-milu marsip qaammataa tamarmi Women's History Monthimik (Arnat oqaluttuarisaanerannut qaammat, aaqq.) taaneqartarpoq.

Pam Stachip oqarnera naapertorlugu aaqqissuussineq atuakkanik atorniartarfianukartartutigut malunniuteqarpoq:

- Arnat ukiui assigiinngitsut innuttaasunilu assigiinngiiaartut amerlanerulersoraakka. Qaammammi piffissat tamarkkerlugu aamma maaniissinnaanerannut aamma soorunami takussutissaavoq, taanna KNR-imut oqarpoq.

Taamaammat aaqqissuussinerugallarnerugaluartup atuuttuaannalersinneqarnissaa aqutsisunit maanna aalajangerneqarpoq.

Atuakkanik ilioraaviit akornanni aaqarnermi atortunik akissaalatsitsisoqanngitsoq

Nalequttat tamponillu akeqanngitsuunissaanut aaqqissuussuteqarnissamut isumassarsiaq Skotlandimit ilaatigut aallaaveqarpoq, Skotlandimimi nalequttat tamponillu pisortat suliffeqarfiini soorlu atuarfinni universitetinilu akeqanngitsumik siorna aasakkut pissarsiarineqarsinnaalersinneqarput.

Aalajangiineq nunat tamalaat akornanni ukkatarineqangaatsialerpoq, skotlandimilu oqartussat suliniummut tassunga katillugit 27 millionit pundit (234 millionit danskit koruunii, aaqq.) immikkoortinneqarput.

Nunatta Atuagaateqarfiani aningaasaliissutit annikinnerupput, Pam Stachillu aaqqissuussinermut tassunga qaammammut 1.500 koruunit missaat atortarlugit naatsorsorpaa, tassanilu nalequttat tamponit immikkoortillugit imaluunniit equutissiat allarutissiallu allat pisiarineranut ilaanersut apeqqutaapput.

AAQARNERMI ATORTUNIK AKISSAALATSITSINEQ SUUA?

UNFPA Naalagaaffiit Peqatigiit ataanni aningaasaateqarfiusoq naapertorlugu aaqarnermi atortunik akissaalatsitsineq aaqarnermi atortunut soorlu nalequttanut tamponinut kiisalu iluatigut atisanut nipaallisaatinullu akissaateqannginnermut taaguutaavoq.

Aaqanermi atortunik akissaalatsitsineq nunani siuarsarniakkani arnanut kisimi sunniuteqarneq ajorpoq, tamannali aamma nunani atugartuuni pisuunerusuni aamma ajornartorsiutaalluni.

Arnat aaqarnermi atortunik pissarsisinnaanngitsut UNFPA naapertorlugu ilinniarnerminni aningaasaqarnerminnilu periarfissanut kingunerluuteqarnerusarput.

Paasissutissarsiffik: UNFPA

Aningaasartuutit akilersinnaalluartut Pam Stach isumaqarpoq. Taassuma oqarnera naapertorlugu aaqarnermi atortut innuttaasut assigiinngiiaartut akornanneersut tamarmik pisortat suliffeqarfiinut soorlu atuakkanik atorniartarfinnut tikilluaqqusaanerannik misigititsisinnaapput.

- Aaqartarnermi piitsuussuseq nunarsuaq tamakkerlugu ajornartorsiutaavoq. Aaqartarnermut atortunut akissaqannginneq inuiaqatigiinnut peqqinnissamullu kingunerlutsitsisarpoq aamma Kalaallit Nunaanni. Pilersaarutip siunertaraa timitta pissusissamisoortui paquminartutut isigiunnaarlugit nalinginnaasumik isigineqarnerulernissaat, Nunatta Atuagaateqarfia facebookikkut marsimi allappoq.

Oqallittariaqarpugut

Naligiissitaanermut naalakkersuisup, Naaja Nathanielsenip aaqanermi atortut akeqanngitsut oqallisigineqarnissaat soqutiginaateqarsoralugu Naalakkersuisunilu ilaasortanut tusarniassallugit Sermitsiamut oqaatigaa.

Tamatumali saniatigut Naalakkersuisut aaqanermi atortunik Skotlandimitulli akeqanngitsunngortitsinissamut piffissami matumani pilersaaruteqartoqanngitsoq oqaatigaa.

Pam Stachip aaqarnermi atortunut akissaalatsitsineq politikkikkut iliuuseqarfigineqartariaqarnersoq oqaaseqarfiginngilaa. Taassumali aaqqissuussineq Nunatta Atuagaateqarfigani atorneqarluartoq qularutiginngilaa, allanilu assingusumik suliniuteqartoqarnissaa kaammattuutigalugu.

- Tamanna pillugu oqallittoqartariaqarsorivara. Kisitsiserujussuunngillammi pineqartut, taanna oqarpoq.