Nunatsinnut soqutiginnittut amerlanerujartortut

- Maani aallartitaqarnikkut toqqaannartumik oqaloqatigisinnaasamik pisariaqartitsisoqartoq isumaqarpunga, Inuuteq Holm Olsen oqarpoq.

USA-p Issittumut soqutiginninnerulernerata kingorna Nunatsinnut soqutiginnikkiartortoqarnera sinniisup malugisimavaa, niuertunillu arlalinnik polikkikkullu aallartitanik arlalinnik naapitsisarsimavoq.

Nunatsinnullu soqutiginnittut sinniisoqarfimmut saaffiginnittarput, tassanilu Nunatsinni kikkunnut attaveqassanerlutik paasitinneqartarlutik.

- Suliama pingaarnersaasa ilagaat, Nunatsinnut tunngasunik soqutiginninnerup annerulersinnissaa, Inuuteq Holm Olsen oqarpoq, ilanngullugulu oqarluni, nammineq isumaqatigiinninniarnissamut pisinnaatitaaffeqarnani. Taamaammat isumaqatiginninniarnerit allanit suliarineqartaput.

Unammillernartut

Nunatta sinniisoqarfia ammarneqarmalli ajunngitsumik ingerlasimasoq, Inuuteq Holm Olsen isumaqarpoq.

- Ammasumik ajunngitsumillu ukiuni marlunni kingullerni pineqarsimallunga isumaqarpunga. Aamma aningaasarsiornikkut naalakkersuinikkullu suliaqartunit ulluinnarni suleqatigisartakkannit soqutiginnittoqartoq malunnarpoq, Inuuteq Holm Olsen oqarpoq.

Nittarsaassiniartorpassuilli akornanniilluni unammillernarsinnaasarpoq.

Inuuteq Holm Olsenimi sinniisoqarfimmi Danmarkip aallartitaqarfiani inissisimasumi kisimiippoq.

Nunattali USA-mi nuimanerulernissaa anguniarlugu sinniisoqarfimmi sulisut aappaagu amerlanerulersinneqarnissaat pilersaarutigineqarpoq.

- Saaffiginnittut assigiinngiiaartorujussuit sullittarakkit, taanna kisimiinninni unamminartuuvoq. Taamaattumik amerligutta assigiinngitsut sukumiinerusumik suliarisinnaassallugit isumaqarpunga, Nunatta Washington D.C-mi sinniisoqarfiani pisortaq, Inuuteq Holm Olsen taama oqarpoq.

USA-mi sinniisoqarfimmut ingerlatsineq ukiumut 2,5 millionit koruuninik akeqarpoq.