Kunnginngortoqarnissaa: Nunatsinnut 1921-imi tikeraartariaqarnermiit nuannaartorineqarnermut

Nunarput kunngikkormiullu qanoq ataqatigiitsigippat? Atuagassiarluuna nunatta kunngikkormiullu ataqatigiilernerannut qanoruna sunniuteqarsimatigisoq? Oqaluttuarisaanermik ilisimatusartoq, Ujammiugaq Engell, tamakku pillugit oqaloqatigaarput.

Allattoq Nicole Sander Bertelsen

januaarip 13-at 2024 10:19

Nutserisoq Hanne Petersen

Dronning Magrethe aappaat sapaatiuppat tunuarpat, kunngissaq Frederik Naalagaaffeqatigiinni kunnginngussaaq.

Oqaluttuarisaanermik ilisimatusartoq, Ujammiugaq Engell, tamanna pillugu oqaloqatigigatsigu aperaarput, kunngikkormiut nunatsinnik qanoq pingaartitsitiginersut aammali nunarput kunngikkormiunik qanoq pingaartitsitiginersoq.

Tamannarpiarlu pillugu Ujammiugaq Engell kunngikkormiut nunattalu qanoq ataqatigiilersimanerisa oqaluttuassartaannik Nuummi akunnittarfiit ilaanni, Hotel Nordbomi, sapaatiuppat oqalugiarluni saqqummiissaaq.

Aamma atuaruk Tronskifte: Kinguaariit nikinnerat: Minka Heilmann kunngissap Frederiup kunnginngornerani Københavnimiissaaq

Saqqummiussassamili ilamernganik unikkaarfigimmatigut, ilaatigut 1500-ikkunni pisimasut, kunngikkormiut nunatsinnut 1921-mi siullerpaamik tikeraarnerat kunngikkormiullu pillugit atuagassiaq taamani alutorsaataasimaqisoq eqqaasanut ilaapput.

- Nunarput inoqartoq qallunaat 1500-kkunnili paasivaat, taamanikkut dronning Margrethe siulliup Danmark naalagaaffigaa, Ujammiugaq Engell unikkaarutini aallarnermagit oqarpoq.

Unikkaarutini aallarnermagit taamaalilluni nunatta naalaatsortumik Danmarkip ataani inissisimalersimaneranut, kunngikkormiut svenskinut akiuuterujussuarnertik pissutigalugu nunatsinnukkarnissamik kinguartitsisarsimanerannut aammali nunatsinnut qanoq alutorinnitsiginerannut, nuannarinnitsiginerannut asannissuseqavitsiginerannullu tunngasunik taasaqalaarpoq.

Hans Egedep tikinneraniit ukiut 200-t qaangiuttut siullerpaamik

- Kunngi Christian sisamaat kunngit paasisassarsiorlutik nunatsinnukalersaartarsimagaluartunut ilaavoq, nunatsinnulli taamani angalaneq akisummat svenskinullu taamani akiuutikkajukkami nunatsinnukarnissi kinguartittarsimavaa.

KUNNGINNGORTITSINEQ

Dronning Margrethep sapaammi januaarip 14-ni tunuarniarnini ukiortaami oqalugiaateqarnermini saqqummiummagu innuttaasut tupaallaatigaat.

Taassuma dronninginngorneraniit ukiut 52-eqqissaat qaangiuttullu ernera kunngissaq Frederik kunnginngussaaq.

Ministeriuneq Mette Frederiksen (S) Christiansborgip aneersuaartarfiani sapaatiuppat nunatta nalunaaqutaa naapertorlugu ullup-qeqqanut kunnginngortumik nalunaaruteqareerpat Kunngi Frederik X siullermeerluni innuttaasunut sassassaaq.

Kunnginngortoq taassuma kinguninngua innuttaasunut oqaaseqassaaq.

Nuummi Katuami kaffillernissamut kikkulluunniit tikilluaqqusaapput. Kaffillernerup nalaani kunnginngortitsineq isiginnaarussuakkut toqqaannartumik malinnaavigineqarsinnaassaaq.

Kunnginngortitsineq KNR-TV-kkut nal. 05.00-imiit ulloq tamaat malinnaavigineqarsinnaassaaq.

Kongens Nytorvimiit toqqaannartumik aallakaatitsineq TV2 Danmark suleqatigalugu KNR2-kkut tallimanngorpat nal. 16.30 isiginnaarneqarsinnaassaaq.

Allisiguk

Dronning Margrethemi aatanilu aananilu, tassa kunngi Christian qulingat dronning Alexandrinelu, nunatsinnut 1921-mi tikimmata, kunngikkormiunik nunatsinnut siullerpaamik tikeraartoqarpoq. Tassa Hans Egedep nunatsinnut tikinneraniit ukiut 200-t qaangiuttut.

- Pisussaaffittut isigilluinnarlugu nunatsinnut siullerpaamik tikeraarput, nunarpummi tamarmi 1921-mi pisortatigoortumik Danmarkiinnap ataani inissisimalerpoq, naak Norgep Tunu tigorusukkaluaraa.

- Taamaammat taamanikkut kunngi nunatsinni aamma kunngiunerminik ilumoorussinini takutinniarlugu nuliani panitsillu ilagalugit nunatsinnut tikeraartariaqalerpoq. Sivikitsuinnarmilli tikeraarput, kingornalu tikeraaqqigatik, Ujammiugaq Engell oqarpoq.

Sanillersuunneqarsinnaanngivittut

Aappariit taakku nunatsinnut asannissuseqarnerat maanna kunngikkormiut dronninngillu nunatsinnut asannissuseqarnerannut sanillersuunneqarsinnaanngivippoq. Dronning Magrethemi angajoqqaanilu, tassa kunngi Frederik qulingiluaat nulialu dronning Ingrid, kunngikkormiuni nunatsinnik soqutiginnittuni nuannarinnittunilu siulliupput.

- Dronning Magrethe prinsesseutilluni aatani aananilu nunatsinnut siullerpaamik tikeraartilluni kinguaaminut ingerlateqqitaminik nunatsinnut asannissuseqalersimasoq nalunanngivippoq. Tamatumami kingornali nunatsinnukakulasalerpoq, nunaqarfiit aamma tikittarlugit.

- Nunatsinnukartariaqanngikkaluarluni tikeraartarpoq. Aamma nunaqarfinnut, taakkunanilu atugassarititaasunik sungiussisimasuunngikkaluarluni tikeraartarpoq, oqaluttuarisaanermik ilisimatusartoq oqarpoq.

Aamma atuaruk Kunnginngortitsinissaq: 1968-imi inunngortut persuarsiulersut

Taamaammat kunngikkormiut nunatsinniikkaangamik naligisutut pisarmatigut nunatsinni nuannarinnitseqaqisut, taanna oqarpoq.

- Dronningip nunatsinnut nuannarinninnini asannissuseqarninilu oqaatsit atunngikkaluarlugit allatigut aamma takutittarpaa, Ujammiugaq Engell oqarpoq.

Nunatsinnullu asannissuseqarnini kunngissamut ingerlateqqissimagaa kalaallillu kunngikkormiunut aamma asannissuseqartut, Engell oqarpoq.

- Kalaalerpassuimmi kunngikkormiunut aamma asannissuseqaqaat.

Kunngikkormiut pillugit atuagassiaq

Tamannalu sumik pissuteqarnersoq aperigatsinni nunatsinni atugassiani siulleq, tassa kunngikkormiut pillugit atuagassiaq, Billed Bladet, tamatumunnga peqqutaaqataasunut ilaasoq oqarpoq.

- Siulivut taamanikkut sukisaarsaaraangamik kunngikkormiut pillugit atuagassiaq qupperakkajuppaat, taamaammat kunngikkormiut siulitta nuannaartoriligaasa siulliit ilaanniipput. Kunngikkormiut assinginik atuagassiamit tassanngaanneersunik angerlarsimaffimminni aamma nivinngasuuteqartarput.

- Atuagassiaq taanna kunngikkormiullu nunatsinnut asannissuseqarmata, kalaaliusugut inuiattut isigineqartutut taakkununngalu atassuteqartutut misigisarpugut.

- Taamaappoq, kunngikkormiummi nunat marluk naapeqatigiiffeqartuaannartanngikkaluarunartut ataqatigiisippaat, tamannalu kalaallinut isumalerujussuuvoq, Ujammiugaq Engell oqarpoq.