Kalaalerpassuit ukioq inunngorfitsik ataqqisaqaat. Tamakku akornganni kusanara, aaqqiaga, peqaannguara tusarsaasarpoq. Peqaannguagut arlaatigut ingerlalluaraangata torrallaasimagaangataluunniit tanngassimaarnanngitsoorneq ajornartarpoq. 1968-imilu inunngortut tanngassimaarutissaqaramik ulluni makkunani pikipput.

Frederik André Henrik Christian maajip ulluisa 26-ianni 1968-imi inunngortoq sapaatiuppat kunngitut ivertinneqassaaq.

Katuaq Kunnginngortitsineq persuarsiutigalugu kaffillissaaq. Tassanilu 1968-imi inunngortut assiliseqatigiinnissaannut aaqqissuussisoqarpoq.

Esther Jensen 1968-imi inunngortoq aaqqissuussisuuvoq, taannalu naapipparput. 

- Arlaliulluta peqatigiilluta kunngissaaraannaavugoortortarnikuugatta, pingaartittuaannarnikuugatsigu kunngissap 68-iunera. Massakkullu kunnginngulermat isumaqarpunga pingaaruteqartoq peqaannguarput nalliussissallugu, Esther Jensen oqarpoq.

Asseq kunngimut nassiunneqassasoq

1968-imi inunngortut Katuap paarlersuani assertik kunngikkormiunut plakatinngorlugu nassiutissavaat. Assilitittussallu qanoq atisaqassanerlutik nammineq aalajangissavaat.

-Tassunga gruppimut immaqa piumasarisinnaavarput kusanartunik atisaqarsinnaagutta. Nammineq aalajangissavaat takkuttut qanoq takutikkusunnerlutik pilluaqqussummut, taanna oqarpoq.

Esther Jensen kunngissap Nuummut ukiut qulit matuma siorna tikeraarmat qanimut takuaa. Kunngissap najugaqarfigisaata Hotel Hans Egedep qanitttuani taamani sulivoq.

- Kunngissaq iseriartortoq inuppassuit silataaneerrattut qiviarsarakku suaartarlugu; "Frederik. Frederik". Qiviannginnami. 68 suaartungalu qiviarlungalu aalateriffigigaminga. Tassuuna ersersippaa aamma nammineq 68 pingaartitaralugu, biilii aamma 68-imik nummerpladeqarput, Esther Jensen oqarpoq.

Kunngissap Frederik qulingata ivertinneqarnera Katuap inersuaaraani sapaatiuppat nalunaaqutaq qulinut isiginnaarussuakkut malinnaavigineqarsinnaassaaq kaffillertoqassallunilu. Aaqqissuussallu aallartinnerani peqaariit assiliseqatigiissapput.