Danskit kunngikkormiuisa oqaluttuarisaanerani aatsaat appassaanik tunuarniartoqarpoq. Ataqqinartorsuaq Dronning Margrethe aappaat taamaalilluni oqaluttuarisaanermi tassunga ilaalerpoq.

Oqaluttuarisaanermi pisoq aamma malugineqanngitsoorsinnaanngilaq, taamaammat pisussamik malinnaanissamut allat peqatigerusukkukkit Nuummi Københavnimilu sumiiffinnik arlalinnik periarfissaqarputit.

Kunngissaq Frederik kunngitut pisortatigoortumik sapaatiuppat nunatta nalunaaqutaa naapertorlugu ullup qeqqanut suaarutigineqassaaq. Kunngi Christiansborg Slotip aneerasaartarfiatigut anillassaaq, tamatumalu kingorna ministeriunerup, Mette Frederiksenip (S) kinguaariit nikinnerat suaarutigissavaa.

Nuummi Kulturip Illorsua

Nuummi Kulturip Illorsua kaffillernermik aaqqissuussissaaq, kikkullu tamarmik tikilluaqqusaapput. Kaffillernermi kinguaariit nikinnerat isiginnaarutersuakkut malinnaavigineqassaaq.

Aaqqissuussineq sapaatiuppat nalunaaqutaq qulinit tallimanut ingerlanneqassaaq.

Nuummi Hotel Nordbo

Sukkasimagaannilu Nuummi Hotel Nordbomit kinguaariit nikinneranik malinnaanissaq periarfissaagaluarpoq.

Akunnittarfik isiginnaarutikkut malinnaatitsinermi saniatigut kaffeqartitsisllunilu kaageqartitsissaaq. Akunnittarfimmilu peqataanissaq sukkasuut ilaanniissimagaanni taamaallaat periarfissaavoq.

Akunnittarfiummi aaqqissuussamut peqataanissamut isissutissat nunguttut Facebookikkut quppernerminni nalunaarutigaat.

Aaqqissuussineq qulinit tallimanut ingerlanneqassaaq. Tamatumalu saniatigut oqaluttuarisaanermik ilisimatusartup, Ujammiugap kunngeqarfiup nunatsinnut atassuteqarnera isumaalu oqaluttuarissavai.

Københavnimi Kalaallit Illuat

Københavnimiikkuit oqaluttuarisaanermilu pisumik nalliuttorsiutiginneqataaniaruit kalaallit allat peqatigalugit Kalaallit Illuannukarsinnaavutit, tassani peqatigiiffik Arnarserit kaffillerlunilu kaageqartitsissaaq.

Kaffillernerup saniatigut illussaarsuarmut malinnaajartorluni ingerlaaqatigiinnissaq peqatigiiffiup pilersaarutigaa, kalaallisoornissarlu aamma periarfissaaavoq.

Aaqqissuussineq danskit nalunaaqutaat naapertorlugu ullup-qeqqanut aallartissaaq, Illussaarsuarmullu ingerlaaqatigiinneq 13.30 aallartissalluni.

Pisortatigoortumik pilersaarut

Kunngeqarfimmit pisortatigoortumik pilersaarut danskit nalunaaqutaat malillugu 13.35 aallartissaaq, Kunngissaq nulianilu Amalienborgimit Christiansborgimut ingerlassapput.

Kingunitsianngualu tassa nalunaaqutaq 13.37 Ataqqinartorsuaq Dronningi aamma Amalienborgimit Christiansborgiliassalluni.

Nalunaaqutaq marlunut naalagaaffimmi siuttut Christiansborgimi siunersioqatigiissapput.

Nalunaaqutaq pingasunut Kunngissaq Frederik Christiansborg Slotip aneerasaartarfianit ministeriunermit Mette Frederiksenimit (S) Kunngi Frederik qulingatut suaarutigineqassaaq. Kunngilu kingunitsianngua innuttaasunut oqaaseqassalluni.

Nalunaaqutaq tallimanut kungikkormiut erfalasui Christian IX’s Palæmit Fredderik den ottendes Palæmut assartorneqassapput.

Pisussaq pillugu kunngikkormiut nittartagaanni annerusumik atuagaqarsinnaavutit.