Minka Heilmann kunngikkormiut qaammatisiutaanik malinnaanngilaq. Taakku 'iliuusererusutaminnik iliuuseqarsinnaasut', taanna oqarpoq.

Taanna nammineq kunngeqarnermik pingaartitsisuunnginnerarpoq.

Taamaakkaluartorli ilaquttami ilai ilagalugit Christiansborg Slotspladsimut kinguaariit nikinneranni sapaatiuppat isiginnaassaaq.

Aamma naak nalinginnaasumik inuit amerlasuut akornanniinnissani nuannarinngikkaluarlugu.

- Pisussaq una oqaluttuarisaanermi pisuuvoq, taamaammat eqqarsarpunga: ’Ilaassaanga!’. Peqataaniarpunga, oqaluttuarisaanermi pisumi kunngissap Frederiup Danmarkimi kunngitut suaarutigineqarnera peqataaffigalugu misiginiarpara, Minka Heilmann oqarpoq.

Taanna arfininngorpat Odensemit ikinngutini ilagalugu Københavniliassaaq, paniminilu unnuilluni, tamarmillu kalaallit Erfalasorput Christiansborgip saani inuppassuit akornanni erfalatinnissaannut piareersimassapput.

Taassuma inuit nunaminnit erfalasulisarnissaat neriuutigaa – aamma nunatsinneersuinnaanngitsut nunanit allaneersut aamma, tassani kunngeqarfiup inuiaat immikkullu inuiaassuseqartut katersuuteqataasut sinniisuuffigisai qanoq amerlatiginersut takutinniarlugit.

- Ulloq taanna puigunngisaannassallugu ilimagaara. Tamannami ataatsimoornermik angisuumik misigititsissaaq, aamma tamanna kunngimut Frederimmut nersuinitsinnik kunngitullu ulluanik siullermik nuannersumik misigititsissalluni, Minka Heilmann oqarpoq.

Kunngi Frederik kalaallit akornanni tulluusimaartitsisinnaasoq

Minka Heilmannip naalagaaffimmi qullersaasoq ukiut 52-t ingerlaneranni nunatsinnut soqutiginningaatsiarnermik takutitsisimasoq sapaatiuppat inuulluaqqussavaa.

- Malunnaateqarnikuuvoq, aamma naalgaaffeqatigiinnermut ataatsimoortitsinissamut atatillugu Kalaallit Nunaannut asanninnini takutillugu pitsaasumik qullersaasimavoq.

Kisianni Frederik Kunnginngortussaq nunatsinnut kalaallinullu inuiaqatigiinnut nutaamik suli pingaarnerusumik isumaqalersinnaasoq, Minka Heilmann oqarpoq.

- Allatut iliuuseqarnissaa naatsorsuutigisinnaavara. Pitsaasumillu tupaallannissarput ilisimagaara, taassumami kunngituyt inuppalaarnerusutut immaqa takutissavaa.

Taassuma inuit kalaallisut tunuliaqutaqartut arpatsitsinertut Royal Runitut ittumik akuutissagai neriuutigaa.

- Kalaallit inuiaqatigiit kunngikkormiut nunatsinnut sinniisuunerannik nunatsinniittarnerannillu tulluusimaangaatsiartartut maluginikuuara. Taamaammallu kalaallinut tulluusimaartitsinissaat pingaaruteqangaatsiarpoq.

Københavnip Politiivini upalungaarsimasut aqutsisuata, Peter Dahlip 'inuit amerlasoorparujussuit' sapaatiuppat Københavnimi najuunnissaat naatsorsuutigineqartoq tusagassiuutinut nalunaarummi oqaatigaa.

Tamannalu aamma pissutigalugu kikkut tamarmik biilitik sikkilitillu angerlarsimaffimminnut qimaannassagaat pisuinnarnissaallu kaammattuutigaa.