Nunatsinniit Danmarkimi efterskolertut pingajorarterutaasa missaat taamaatissimasut
Nunatsinniit Danmarkimut siorna aggustimili efterskoleriartut ukioq atuarfigisassaat takorluukkamittut eqqajanngilaq.
Nunatsinniimmi Danmarkimut misigisassarsioriartorlutik inuttullu ineriartoriartorlutik aasaq efterskoleriartut pingajorarterutaasa missaannit ikinnerunngitsut taamaatissimapput. Nunatsinni Ilinniartitaanermut Aqutsisoqarfimmit kisitsisini tamanna erserpoq.
AAMMA ATUARUK Corona Steviep efterskolernissaanut akimmisaarisoq
Katillutik 189-it nunatsinniit Danmarkimi ukiumi ataatsimi efterskolernermut Namminersorlutik Oqartussanit tapiiffigitissimapput.
Nunatsinniilli Danmarkimi efterskolertutut suli nalunaarsoqqasut marsip aallaqqaataani 130-nnaapput. Tassa imaappoq, nunatsinniit ukiumi maannakkut atuarfiusumi efterskolertuni 59-it taamaatissimapput.
Taakku saniatigut angajoqqaat akiligaannik Danmarkimi efterskolertoqarpoq. Taakku Ilinniartitaanermut Aqutsisoqarfianit nalunaarsugaanngillat.
Corona peqqutaanerpaasoq
Coronavirusip Danmarkimi tuniluunneranik aarleqquteqarneq peqqutaanerpaasoq, Ilinniartitaanermut Aqutsisoqarfimmit atuartitsinermut pisortaq Brita Toft Hyldgaard KNR-imut ilisimatitsivoq.
Danmarkimimi siorna decembarip qiteqqunneranili aappassaanik killilersuisoqarpoq. Danmarkillu ilaani, tassa Jyllandip kangisissuani, Jyllandip avannarpasissuani Bornholmimilu efterskolit pingasut aatsaat ataasinngormat marsip aallaqqaataani ammaqqissinnaanngorput.
Danmarkip sinnerani efterskolit marsip ulluisa 15-iata kingorna poorskereerpalluunniit ammaqqissangatinneqarput.
Nunatsinniit efterskolertuni taamaatissimasut procentinngorlugit:
2016/17: 17 procent
2017/18: 15,4 procent
2018/19: 17,2 procent
Efterskolertuni Danmarkimeersuni taamaatissimasut procentinngorlugit:
2016/17: 11,2 procent
2017/18: 11,3 procent
2018/19: 10,7 procent
Tusarfiit: Danmarkimi efterskolit peqatigiiffiat, Kalaallit Meerartaat
Sivisuumillu killilersuisoqarnera nunatsinni ilaqutariit ilarpassuisa qitornaminnik angerlarsimatitsiinnarnerannik kinguneqarpoq.
AAMMA ATUARUK Kalaallit inuusuttut efterskolernerminnik corona pissutigalugu matusinerup kingorna unitsitsisut
Angerlarserneq, oqaatsitigut aporfeqarneq ingerlanerliornerlu Danmarkimi efterskolerunnaarnermut peqqutaaqataanerpaasartunut ilaasut, Ilinniartitaanermut Aqutsisoqarfik ilisimatitsivoq.
Siornali efterskolerunnaarsimasut amerlanerungaatsiarput. Danmarkimimi efterskolit qaammatit marluk sinnerlugit matoqqareerlutik maajip qiteqqunnerani ammaqqimmata, nunatsinniit efterskoleriartut 150-iusuni 82-init ikinnerunngitsut, tassa affaasa missaat taamaatissimapput.
Nunatsinniit Danmarkimi 2019/2020-mi 2020/2021-milu efterskolertut affaannit ikinnerunngitsut taamaatissimammata ukiut atuarfiusut siuliini taamaatissimasunit amerlanerungaatsiarput.