Corona Steviep efterskolernissaanut akimmisaarisoq
Nuummi najugalik, Stevie Maqe 15-inik ukioqarpoq. Taanna Canadami oqaatsinik pikkorissariarusukkaluarpoq. Coronavirusili siorna tuniluutilermat angorusutani angusinnaajunnaarpaa.
Taarsiulluguli Randersip avannaata tungaani Frydensborgip efterskoliani atuariartornissaminut akuerisaavoq.
AAMMA ATUARUK Danskit efterskoliini ernumasut: Kalaallit ukioq manna efterskoleriarniartut ikinnerusut
- Taava efterskole siunniupparput. Kisianni aamma Danmarkimi taamatut tuniluulluni aallarteqqeriarmat, aamma taanna aporfinngorpoq, Stevie Maqep anaanaa Birthe Poulsen taama oqarpoq.
Ilaqutariillu Maqekkut efterskolit pillugit kisimik qularuteqanngillat.
Kalaallit Danmarkimi efterskolini ukiumi atuarfiusumi 2020/21-mi atuartussat siornamut sanilliullugit 60-inik ikinnerusut, Danmarkimi efterskolit peqatigiiffiat paasissutissiivoq.
Tamanna 20 procentimik ikileriarneruvoq. Tamannalu Danmarkimi efterskolit peqatigiiffianni siulittaasup, Torben Vind Rasmussenip ernumanartippaa.
Siunissamut ajoqutaasinnaasoq
Kalaallit inuusuttut ukiumut 300-t missaanniittut Danmarkimi ukiuni kingullerni efterskolertarput. Inuusuttut Danmarkimi efterskolersimasut Danmarkimi kingornatigut ilinnialeraangamik atuagarsornikkut oqaatsitigullu artorsannginnerusartut misilittakkat takutippaat.
Kalaallilli inuuusuttut ilaasa coronap nunarsuaq tamakkerlugu tunillaassuunnera pissutigalugu angerlarsimaannarnissaminnik aalajangernerat pissusissamisoortoq, Torben Vind Rasmussen oqarpoq.
Nunatsinniilli atuariartortut ukiumi ataatsimi ikinnerunissaata siunissamut ukiuni arlalinni kingunerlussinnaanera taassuma ernumatigaa.
Efterskolinimi atuartorpassuit qatanngutimi, ikinngutimi ilagisartakkalluunniit allat efterskolernikuusimanerat pissutigalugu efterskolertartut ilisimaneqarpoq.
PIffissap takutikkumaapaa
Coronap Danmarkimi qanoq tuniluutsigissanersoq angajoqqaavisa utaqqimaaqqaarusuppaat.
Danmarkimilu tuniluunneq upernaaru suli taamaaginnassappat, ernertik maani Nuummi atuartiinnarniarlugu aalajangertariaqarlutik, Birthe Poulsen oqarpoq.
- Tassanngaaniit takujumaarparput qanoq inerneqarumaarnersoq, inissisimaffik taanna allanngornersoq. Allannguuteqassanngippat pilersaarutigivarput GU-mut qinnuteqarumaartoq. Akuerisaassaguni GU-rumaarpoq.
Stevie Maqep Canadami oqaatsinik pikkorissarluni angalanissani meeraallunili takorluugarisarpaa.
Tamannalu pisinnaajunnaarmat efterskolernissani siunniuppaa. Coronavirusilli aamma tamatuma piviusunngortinniarnissaanut aporfinera Steviep Maqep uggorigaa, Birthe Poulsen oqaluttuarpoq.
- Soorunami inuttaa aamma nammineq nalornivoq. Taavalu inuttaata corona qanoq ingerlaarnersoq ilisimareeramiuk paasinnippoq, kisianni soorunami uggorivaa.