Danskit efterskoliini ernumasut: Kalaallit ukioq manna efterskoleriarniartut ikinnerusut
Danskit efterskoliini atuarneq pisarnertut maanna inngilaq.
Danskit atuartut corona pissutigalugu angerlartinneqarput, kalaallillu atuartut ilaquttani attaveqaatigisaminniinngikkunik, nunatsinnut angerlarsimanngikkunik efterskolimi susassakinnerusuni kisiartaangajapput.
Kalaallit Danmarkimi efterskolini ukiumi atuarfiusumi 2020/21-mi atuartussat siornamut sanilliullugit 60-inik ikinnerusut, Danmarkimi efterskolit peqatigiiffiat paasissutissiivoq.
AAMMA ATUARUK Ivik efterskolit matoqqanerat pillugu: Qaammatit marluk ukiut marlutut misiginarput
Tamanna 20 procentimik ikileriarneruvoq. Tamannalu Danmarkimi efterskolit peqatigiiffianni siulittaasup, Torben Vind Rasmussenip ernumanartippaa.
- Suliniuteqanngikkutta coronap kingorna Kalaallit Nunaanniit Danmarkimut efterskoleriarnissamut soqutiginnittoqarpallaarunnaarsinnaavoq, taanna KNR-imut oqarpoq.
Siulittaasoq: Coronap ikilisitsinera pissusissamisoortoq
Kalaallit inuusuttut ukiumut 300-t missaanniittut Danmarkimi ukiuni kingullerni efterskolertarput. Inuusuttut Danmarkimi efterskolersimasut Danmarkimi kingornatigut ilinnialeraangamik atuagarsornikkut oqaatsitigullu artorsannginnerusartut misilittakkat takutippaat.
Kalaallilli inuuusuttut ilaasa coronap nunarsuaq tamakkerlugu tunillaassuunnera pissutigalugu angerlarsimaannarnissaminnik aalajangernerat pissusissamisoortoq, Torben Vind Rasmussen oqarpoq.
Nunatsinniilli atuariartortut ukiumi ataatsimi ikinnerunissaata siunissamut ukiuni arlalinni kingunerlussinnaanera taassuma ernumatigaa.
Ukioq atuarfiusoq 2016 / 2017: kalaallit atuartut 271-it
Ukioq atuarfiusoq 2017 / 2018: kalaallit atuartut 298-it
Ukioq atuarfiusoq 2018 / 2019: kalaallit atuartut 291-it
Ukioq atuarfiusoq 2019/ 2020: kalaallit atuartut 288-it
Ukioq atuarfiusoq 2020 / 2021: kalaallit atuartut 228-t
Paasissutissarsiffik: Danmarkimi efterkolit peqatigiiffii
Efterskolinimi atuartorpassuit qatanngutimi, ikinngutimi ilagisartakkalluunniit allat efterskolernikuusimanerat pissutigalugu efterskolertartut ilisimaneqarpoq.
- Atuariartortut ikinnerussappata taava uagut peqatigiiffittut immaqalu Namminersorlutik Oqartussallu qanoq iliornikkut Danmarkimi efterskoleriarusuttunik efterskolertitsinissamik qulakkeerinissarput pingaaruteqarpoq.
Taamaammat efterskolit peqatigiiffiata nunatsinni Danmarkimilu politikerit kalaallinik inuusuttunik Danmarkimut efterskoleriartitsinissamut tapersiinissaat kissaatigaa.
Aningaasat ajornartorsiutaanngitsut
Danmarkimi efterskolit namminersortuupput. Taakku angajoqqaat akiliuteqarnerannit, pisortaniillu tapiissuteqarfigineqarnikkut ingerlatsisarput.
Isertitassanilli annaasaqarnissaq efterskolit maanna ernumassuteqarnerannut pissutaanngilaq. Danskimmi efterskolii ingerlalluarnertik pissutigalugu danskinik atuartunik suli amerlanerusunik aallartitsisinnaapput.
- Danskiinnarnut atuartunut pilerisaaruteqarnissarput immaqa ajornannginneruvoorluunniit, Torben Vind Rasmussen oqarpoq, nangillunilu:
- Kalaallilli Danmarkimi efterskoleriarsinnaanissamik periarfissaqarnissaannut kivitsinissamik aaqqiissuteqarnissaq danskit efterskoliisut pisarneq malillugu suliassaqartarsimalluta misigisimavugut.
AAMMA ATUARUK Juullikkunni angalanissaq nangaasaarutigilluinnaraat
Efterskolit peqatigiiffiata Folketingimi Kalaallit Nunaannut tunngasunut ataatsimiititaliaq sapaatip akunnerata tulliani ataatsimeeqatigissavaa. Peqatigiiffiup Namminersorlutik Oqartussat tamatuma kingorna attaveqarfigerusuppai. Politikerit atorfillillu Danmarkimut efterskoleriartornissamut neqeroorummik suli tapersiissuteqarnissaat peqatigiiffiup neriuutigaa.
- Efterskoleriarusunngitsunik aallartitsisinnaanngilagut. Kalaallit Nunaannili inuusuttut Danmarkimi efterskoleriarnissamut periarfissanik tamatumalu ataasiakkaanut qanoq iluaqutaasinnaaneranik paasitinneqarnissaat qulakkiissavarput, Torben Vind Rasmussen oqarpoq.
