Nunatsinni timmisartuni teknikerit: Air Greenland nikeriartinnagu isumarput aalajangiusimassavarput
- Nunatta sinnerani angallattussat eqqorneqarnissaat ajuusaarnaraluarpoq, uagummi tamanna angunianngikkaluaratsigu. Kisianni Air Greenland nammineerluni taamatut aalajangerpoq.
Air Greenlandimi timmisartumi teknikerit Kattuffiani siulittaasoq, Kim Bjerregaard oqarpoq.
Dansk Metalimi Air Greenlandimilu isumaqatigiinngissuteqarput.
Isumaqatigiissut qaangiuttoq
Pisut najummatsisimanartumut killinnissaannut peqqutaasoq tassaavoq, Air Greenlandip flymekanikerinut isumaqatigiissutaa 2020-mut killilik atorunnaarmat, coronali pissutaalluni isumaqatigiissut 2021-p tungaanut tasikkallarneqartariaqarsimavoq.
Maannali 2022-miippugut maannalu aamma akissarsiatik qaffakkusulerpaat, isumaqatigiinniarnerillu unittoorput.
Taamaammat Dansk Metal Københavnip Kangerlussuullu akornanni timmisartuussinermi apriilip ulluisa qulingiluaannit suliumajunnaarsinnaanermik aarlerisaaruteqarpoq.
Air Greenland akissuteqarluni timmisartumi mekanikerit, Dansk Metalimi ilaasortaasut tamarmik mattunniarpai. Mattussineq apriilip ulluisa 11-anni pissaaq, taamaalillunilu nunatta iluani timmisartut angalasinnaajunnaassapput.
Air Greenlandip oqarnera naapertorlugu atlantikoq qulaallugu timmisartuussineq angallannerup ilarujussuanut tassa nioqqutissanik, allakkanik nerisassanik allanillu assartuinissamut tunngaviliisuummat nunatta iluani timmisartuussinerup attatiinnarnissaa isumassaqanngilaq.
Imarpik qulaallugu timmisartuussisartup Norsap, Kangerlussuarmi teknikerii marluk uani pineqarput. Taakku akissarsiai qaffaavigineqanngippata suliumajunnaarnissaminnik kattuffiup Air Greenlandimut siorasaarutigaa.
AAMMA ATUARUK Suliumajunnaarnissamut ilisimasalik: Mekanikerit Air Greenlandimut pissaaneqarput
Taamaaliortoqassappallu Air Greenlandip timmisartumi mekanikerini apriilip aqqarnganiit sulisikkumajunnaarniarlugit akissuteqarpoq. Sulisitsiumajunnaarpallu apriilip aqqarnganiit nunatta iluani timmisartuussinerit unitsinneqassapput.
Akissarsiat pillugit isumaqatigiittoqanngippat timmisartut hangarimiiginnassapput
Air Greenlandip timmisartumi mekanikerii teknikeriilu Dansk Metalimut ilaasortaapput. Taakku katillugit 70-it missaanniittut Air Greenlandimi atorfeqarput.
Kim Bjerregaard nunatsinni timmisartuni teknikerit kattuffianni siulittaasuuvoq.
- Nikittoqanngikkunik isumaqatigiittoqanngikkunik taava timmisartoq uninngasariaqarpoq, Air Greenlandip piumasaqaatitta tusaaniarneqarnissaasa tungaanut, KNR-imut oqarpoq.
AAMMA ATUARUK Sulisut peqatigiiffiat: Mekanikerit marluk timmisartumik angallanneq unitsissinnaagaat
Air Greenland Dansk Metalilu apriilip aallaqqaataani naaperiarniarlutik Danmarkimi ataatsimeeqatigiissapput. Tassani Air Greenlandip timmisartumi mekanikerii teknikeriilu akissarsiaasa qaffaavigineqarnissaannut naaperiarniarput.
- Uagut piumasariinnarparput suliffeqarfiup malugissagaa, taamaaliornerput pimoorukkipput. Piumasaqaatigulli naleqqutinngitsut taakku akissuteqarput. Uggornarpoq tamaannga killittoqarmat.