Nunatsinni siuttuvut Ukrainemut tikeraarnissaannut qaaqqusaasut
Ukrainep præsidentia, Volodymyr Zelenskyj, Danmarkimi tikeraaqqammivoq. Naalakkersuisut Siulittaasuat, Múte B. Egede Inatsisartullu Siulittaasuat, Kim Kielsen, aammattaaq taamaalisukkut tikeraarsimapput.
Tikeraarnerminni Naalakkersuisut Siulittaasuat Inatsisartullu Siulittaasuat immikkuullarissumik qaaqquneqarput. Zelenskyp atorfilittaasa nunatsinni siuttuvut tamat oqartussaanerat pillugu Ukrainemi oqaloqatigiinnissamut aggersarpaat.
Kim Kielsen KNR-imut taama oqarpoq.
Tamanna pisortatiguunngitsumik qaaqqusineruvoq. Nunarpullu qaaqqusissummut akissuteqannginnermini sillimaffigisassaqalaarpoq.
- Soorunami ingerlaannavik akuersinngilagut. Qanoq pisoqassanersoq nunatsinni isummerfigiumaarparput, Kim Kielsen oqarpoq nangillunilu:
- Takulaartariaqarparput, suunukua tassani oqallisiginiarneqartut. Assigiinngitsut soqutiginassappata, taava peqataasinnaanissarput takorloorneqarsinnaavoq.
Nunat allat innuttaasuminnik oqartussaateqataatitsisut aamma aggersarneqarsimasut Kim Kielsenip ilanngullugu oqaatigaa.
Kikkorpiaat peqataassanersut qaqugulu oqaloqatigiinneq ingerlanneqassanersoq suli inissinneqanngilaq.
Nunarput qutsavigigaa
Zelenskyp Múte B. Egede Kim Kielsenilu qanimut aamma oqaloqatigisimavai. Oqaloqatigiinnerminni Ruslandip Ukrainemut saassussineraniilli nunatta Ruslandimut pillaatitut iliuuserisimasai pillugit ilaatigut eqqartuisimapput.
Ruslandip siorna februaarimi Ukrainemut saassussineraniilli sorsunneq suli ingerlavoq.
Naak nunatta avammut tunisartagaasa 15 procentii Ruslandimut tunineqartaraluartut Inatsisartut nunatta Ruslandimik niueqateqarnerata unitsinneqarnissaa aalajangernikuuaat.
- Taama aalajangertoqarsimaneranut qujavoq. Nunarput taamannarujussuaq aningaasaateqanngikkaluarluni taamatut aalajangiissuteqarsimaneranik paasinnilluni qujassuteqarfigalugu ersarissarpaa, Kim Kielsen oqaloqatigiissimanertik pillugu taama oqaaseqarpoq.
Zelenskyp Danmarkimi tikeraarnera
Volodymyr Zelenskyj Danmarkimut sapaatiummat tikippoq. Ukrainemi russinut sorsunnermi Danmarkip sunneeqataanera pillugu Zelenskyj ataasinngornermi Christiansborgimi inatsisartut ataatsimiittarfianni oqalugiarpoq.
Oqalugiarnermini Danmarkip timmisartunik sorsuutinik F-16-inik Ukrainemut tunissuteqarnerannut ilaatigut qujassuteqarpoq.
Ukrainep præsidentia Danmarkimi ataasinngornermi angumerisassai amerlasimapput. Partiit siulittaasui, gruppit siulittaasut Folketingimilu ataatsimiititaliani arlalinni siulittaasut naapissimavai, aammattaaq dronning Margrethemut ulloqeqqanut neriartorsimavoq.
Maanna Grækenlandimi Athenimut ingerlaqqilluni aallarsimavoq, tassani ataasinngornermi nunap ministeriisa qullersaat Kyriakos Mitsotakis naapeqatigissavaa.
