Ukrainimiut Nuummiittut sorsuffimmiikkunnaarallaqqasut: Nunatsinni siggartaassuit aarlerisaaruteqaannaavipput
20-nik ukiullip, Valentina Luhovap aamma 21-nik ukiullip, Shyliak Valeriiap qaartartumeerinernit, sorsunnerup aserortigaanit siggartaassuillu aarlerisaaruteqarnerannit ungasissumiillutik aningaasaqarnermut tunngasumik ilinniagaqarnertik Nuummi Ilinniarfimmi eqqissillutik ukkatarisinnaavaat.
- Illoqarfigisatsinni maanna eqqissisimasoqarpoq, kisianni najugaqarfitsinni aarlerisaarinermik siggartaatit aallartikulapput, Shyliak Valeriia oqarpoq.
Arnat taakku marluk Ukrainemi sorsunnerup ingerlanerani saassunneqangaatsiaqqasumit, Kharkivimit 150 kilometeriinnarnik ungasitsigisumiittumi illoqarfimmi Poltavami National University Yuri Kondratyuk Poltava Pokytechnicimi ilinniartuupput.
Poltava ukiuunerata ingerlaneraani ilaatigut innaallagiaqanngilaq. Naak illoqarfik rakettinik saassunneqanngikkaluartoq sorsuttoqarneranit ullut tamaasa sunnigaangaatsiaqqavoq.
- Ikinngutigut illoqarfigisatsinnit qimaanikuupput, kisianni angut arlallit nunatsinnik illersuiniarlutik uninngaannartariaqarput, Valentina Luhova oqarpoq.
Ilinniartut ilinniarnerat Erasmus+-imit ilaatigut aningaasaliiffigineqartoq aqqutigalugu Ilisimatusarfiup Poltavami universitetimut suleqatigiinnissamik isumaqatigiissuteqarnera arnat Nuummiipput. Ilisimatusarfik tamatuma saniatigut ilinniartitsisumik ataatsimik aamma tikeraartoqarpoq, taannalu inuussutissarsiornermi aningaasaqarnermik ilinniartitsinermi ikiuutaassalluni.
- Siusinnerukkut suliartuinnarsinnaasarpugut, ikinngutigut pulaarsinnaasarpagut, angerlarallarsinnaasarpugut, kisianni maannakkut tamanna ajornaappallaanngilaq. Ulluinnagut sorsuttoqarnera pissutigalugu uippakajaarfiupput, Valeriia Shyliak oqarpoq.
Ulluinnaat nalinginnaasut
Ilisimatusarfiup Poltavamilu universitetip akornanni suleqatigiinnissamik isumaqatigiissut Ilisimatusarfiup Ruslandip Ukrainemut saassussineranik pisortatigoortumik assuarinnissummik saqqummiussinerata ilagaa.
Ilisimatusarfik tusagassiuutinut nalunaarummi ima allappoq:
- Uagut ilinniarfittut inunnut sorsunnermi annilaanganartorsiornermik ulluinnarsiuteqarsimasunut neqerooruteqangaarsinnaanngilagut. Ukrainemeersulli pingasut tikeraartussatsitut tikilluaqqunerisigut ulluinnarnut utertutut misigiffigisinnaasaannik toqqissisimanarnerusunik avatangiiseqarallartissinnaassavavut.
Sorsuttoqarnera nunarsuaq tamakkerlugu aningaasaqarnikkut takussutissaqarluarpoq, maani nunatsinni innuttaasut angerlarsimaffimminni nerisassaqarnissamut ulluinnarni missingersuutinut aningaasassanik immikkut nassaarniartoqartariaqarpoq. Ukrainemi aningaasat aamma naleerukkiartorput, tamatumalu saniatigut nioqqutissanik Ukrainemut assartuiniarnerup ajornakusoornera pissutigalugu isumalluutit amigaataangaatsiarlutik.
- Sorsunneq assigiinngitsutigut uagutsinnut sunniuteqarpoq. Inuit sumunnassanerlutik naluaat, taamaammat sillimaniarnermut ininut najugaqariartorlutik qimarngupput. Aningaasaqarniarnermi aningaasat naleerutingaatsiarput, taamaammat inuuniarnerput ajornakusoorpoq, Valentina Luhova oqarpoq.
Taamaammat arnat taakku marluk nunagisartik qimallugu nunarsuup ilaani, sorsunnermik sunnigaannginnerusumi allamiilaarnerat aniguilaarneruvoq.
- Maanngarnerput nuannaarutigilluinnarparput, pissutigalugu misigisaq uagutsinnut nutaarluinnaavoq. Kalaallit Nunaanni kusanarluinnartumik qaqqaqartumi pinngortitaqarpusi, misigineralu nuannaarutigilluinnarparput. Pinngortitaq allaanerungaatsiarpoq. Ukrainemi maanna kiappoq, maanili qiianarpoq, Valeriia Shyliak qungujulluni oqarpoq, nangillunilu:
- Kalaallit Nunaanni inuit Ukrainemut tunngasunik ilisimasaqarput, uagut Kalaallit Nunaat pillugu ilinniagaqarpallaarneq ajorpugut, taamaammat maanngarnerput uagutsinnut periarfissarujussuullunilu ilisimasat nutaajupput.
Siunissamut neriuuteqartut
Valentina Luhova aamma Valeriia Shyliak aggustip tungaanut Ilisimatusarfimmut attuumassuteqarput, taamaakkaluartorli masterimik ilinniagaqarnerminni naggataarutaasumik misilitsinnissartik pissutigalugu Ukrainemut juunimi angerlartariaqassallutik.
Naak Ukraine sorsunnermit, toqorartoqarneranit, aserorteriffiuneranit sunnigaangaatsiaraluartoq Ukraine nunagigamikku tassani inuuneqarusullutik erseqqissaatigaat.
- Ukrainemiiginnarusuppunga, suliffissarserusuppunga, ilaqutakkalu inooqatigerusullugit, Valentina Luhova oqarpoq.
Taassuma aningaasaqarnermik ilinniakkani niuernerup iluani atorsinnaassallugu neriuutigaa. Valeriia Shyliak aamma taama neriuuteqarpoq:
- Aningaaserivimmi suliffissarsinissara neriuutigaara, taanna oqarpoq.
Taakkulu siunissamut qanoq neriuuteqarnerannik aperineqaramik tamarmik ataatsikkut oqarput:
- Ukrainep sorsunnermi ajugaanissaa neriuutigaarput.
