FN: Sakkutuujunngitsut 8500-ngajaat Ukrainemi sorsunnermi toqutaapput
Siorna februaarimi russit Ukrainemut saassussimmatali Ukrainemi najugallit inuit nalinginnaat tassa; sakkutuujunngitsut 8500-t missaat toqutaasimasut Naalagaaffiit Peqatigiit tassa FN-p inuit pisinnaatitaaffiinut tunngatillugu allaffeqarfianiit ullumi marlunngornermi nalunaarutigineqarpoq.
Ilimagineqarporli toqutaasut nalunaarsorneqarsimaneranniit, toqutaasut 1000-nik arlalinnik suli amerlanerusimassasut.
FN-p allaffiani toqutaasimasutut nalunaarsukkat 8490-t allassimapput, ikiligaasimasullu tassa aqqunarneqarsimasut 14.244-nik maannamuugallartoq allassimasuutigineqarput.
FN-imiilli qangali oqaatigineqartarpoq, kisitsisit allassimasut isaasalerlugu taamaallaat immap qaavaniit ilulissap ersittortaannaatut takussutissaannaasut, sorsuffiusumimi piviusut allarluinnaammata.
Toqutaasut amerlanersaat nunap ilaani Ukrainemiut naalakkersuisoqarfianit nakkutilliiffigineqartuni russit sakkutuuinit toqunneqartarput.
Ukrainep illoqarfiisa ilaanni Donetskimi aammalu Luhanskimi akersuuffiunerpaasuni 3927-t toqutaasimapput.
Russimmi Donetskip kangiatungaani saassussinerpaapput tamaani illoqarfeerarpassuit sakkortoqisumik qaartartumeeriffigineqaqattaarujussuarlutik.
Naalagaaffiit Peqatigiit misissueqatigiissitai misissuereerlutik oqarput, russit saassussinerminni soqutigittaaqalutik inuit sussuseqanngitsut nalaatsornerinnarmik naapitatik tapullugit toquttarsimagaat.
