PAASISSUTISSAT: Ukrainemi sorsuttoqarnerani toqusut qasserpiaanersut nalornisigineqartoq qimaasullu millionilikkaajusut
Ruslandip præsidentia Vladimir Putin ukiup ataaserpiaap matuma siorna Ukrainep saassunneqarnissaanik peqqusivoq, tamanna inuppassuit taamannak millionilikkaat inuunerannik naleqarpoq aammalu inuppassuit qimarrapput nunalu Ukraine sequmilluinnarlugu.
Oqaatigineqarporlu inuit toqusorpassuit qasserpiaaneri nalunaarsoruminaassimaqisoq.
Tamannalu patsiseqartinneqarpoq Ukrainemiit Ruslandimiillu toqusut qassiunerinik paasissutissat tigummimmatigit aammalu ikinaarlugit paasissutissiissutigineqartarlutik.
Norgemi illersornissamut pisortaasup Eirik Kristoffersonip jannuaarimi oqaatigaa, russit sakkutuui 180.000-t toqutaasimasut ikiligaasimallutilluunniit. Ukrainemiullu sakkutuui 100.000-t missaat toqutaasimapput inuillu sakkutuujunngitsut 30.000-t toqutaasimallutilluunniit ikiligaasimapput.
Ukrainemiilli nalunaarutigineqarpoq inuit sakkutuujunngitsut 20.000-t toqutaasimasut.
Mannali tikillugu sorsunnermiit inuit 8 millionit nunanut allanut qimaapput, sorsunnersuullu kingulliup kingornali aatsaat taamak amerlatigisut qimaasut erseqqissaatigineqarpoq.
