Nunatsinni sakkutooqarnerulernissaq: Sisimiuni innuttaasut tapersersuisut

Nunatta nunarsuarmi sillimaniarnikkut illersornissamut pingaaruteqarnera, nunattalu sakkutooqarfeqarnerulersinnaanera qanoq pingaaruteqartiginersut pillugit. Naalagaaffinngornissamut Nunanullu allanut naalakkersuisup Vivian Motzfeldtip tusagassiortunik katersortitsinermini marlunngormat saqqummiuppaa.

Suliamut atatillugu KNR-ip aqqusinermi naapitani innuttaasut qanoq isumaqarnersut paasiniaafigai.

Nunatsinni sakkutooqarfeqarnerulerpat Anders Lundbladip toqqissiallannarnerutippaa. Assi © : Brian Mølgaard / KNR

Nunarput sakkutooqarfeqarnerulissappat annilaarnarpa imaluunniit toqqissisimanarpa?

- Annilaarnarinngilara, toqqissiallarneruvoq. Annertunerusinnaavoq illersorneqarnissarput, Anders Lundblad oqarpoq.

Qapak Jeremiassenip sakkutooqarfeqarnerulernissaa pisariaqarpallaarsorinngilaa. Assi © : Brian Mølgaard / KNR

Qapak Jeremiassenillu nunatsinni sakkutooqarfeqarnerulernissaa annilaarnarinngikkaluarlugu pisariaqarpallaarsorinngilaa.

- Imatut annilaarnanngikkaluarpoq, kisianni inuiaqatigiit taama ikitsigaluta sakkutooqarnissarput pisariaqarpallaanngikkaluarpoq, Qapak Jeremiassen oqarpoq.

Nunatta illersornissaa pillugu annertusaanissaq toqqissisimanartoq Taatsi Fleischer isumaqarpoq. Assi © : Brian Mølgaard / KNR

Issittumi illersornissaq pillugu nunatsinni sakkutooqarfeqarnerulissappat toqqissisimanarnerusoq Taatsi Fleischer isumaqarpoq.

- Ukua pisut eqqarsaatigalugit sakkutooqarnerup inissisimanissaa Nunatsinni taanna pioreerami, taava annertusarniarunikku taanna soorunami toqqissisimanartutut isigivara, uagut aamma nammineq illersornissarput eqqarsaatigalugu, Taatsi Fleischer oqarpoq.

Nunatsinni sakkutooqarfeqarnerulerpat sillimaffigisariaqaripput Jørgen Gundel isumaqarpoq. Assi © : Brian Mølgaard / KNR

- Soorunamili arsaariaannaavaatigut nunatsinnik, taamaaliussagunik, taannartaa sillimaffigisariaqarparput, Jørgen Gundel oqarpoq.

Nunatsinni innuttaasut peqataanissaat qanoq pingaaruteqartiginersoq Vivian Motzfeldtip arlaleriarluni oqaatigaa, nunattami nunamik illersuinissaq annermik nammineerluni kivissagaa isumaqatigiissummi anguniakkanut ilaavoq.

Kivitseqataassaguttami qanoq isumaqarfigaajuk?

- Pissusissamisoorpoq, qangali taamaattariaqaraluarpoq immaqa, massakkut pisut eqqarsaatigalugit, Anders Lundblad oqarpoq.

- Eqqarsaat kusanarpoq, aamma kivitseqataasussaavugut, soorunami nalunaraluarpoq qanoq, massakkorpiaq qanoq iliortoqassanersoq. Alloriarneq siulleq taanna tigoqqaartariaqaratsigu taava piffissap takutikkumaarpaa qanoq kivitseqataalluarnerusinnaanersugut nammineerluta Nunatsinni, Taatsi Lundblad oqarpoq.

Sakkutooqarfeqarnerulerneq nunatsinnut iluaqutaasinnaappat Samuel Petersenip qujaruppaa. Assi © : Brian Mølgaard / KNR

Samuel Petersen aamma isumaqataasut ilagaat.

- Apeqqutaavoq. Sorsuttoqarnermi uagutsinnut iluaqutaasinnaappata qujanaq. Nunarsuarput sakkortusigaluttuinnarnera ilutigalugu aamma uagut piareersartariaqalerpugut, suleqataasariaqalerpugut, Samuel Petersen oqarpoq.