Folketingimi naalagaaffeqatigiinneq pillugu oqallinneq: Suleqatigiinnerup pitsaanerulersinnissaanut piareersimavugut
Naalagaaffeqatigiinneq Folketingimi oqaluuserineqarmat danskit ministeriunerata, Mette Frederiksenip (S) oqaaseqarnermini kalaallit nersualaarpai.
Ministeriunerup naalagaaffeqatigiinneq pillugu nalunaajaat saqqummiuppaa, ukiorlu nalinginnaanngitsoq oqaasertalerlugu.
- Kalaallit Nunaat naalagaaffeqatigiinnerlu ukiut inuup inuuffiini iligisamit ukiup affaani kingullermi akuersaarneqarsinnaanngitsumik tatineqarpoq. Naalagaaffitta ilaanik tigusinissamik piumasaqarneq, tiguaanissamik sakkutuulersorfiunnginnissaanik itigartitsinngiffiusumik sioorasaarinerit.
- Kalaallit inuit nukeqangaatsiarnerminnik takutitsinerannik nersungaatsiarpakka, Mette Frederiksen oqarpoq.
Tamatuma saniatigut Danmarkip kalaallinut inuiaqatigiinnut aningaasaliinerunissaq piareersimaffigaa uteqqippaa.
- Suleqatigiinnermut pitsaanerulersitsinissamut piareersimavugut, kalaallinut inuiaqatigiinnut aningaasaliinissamut piareersimavugut, Kalaallit Nunaatalu namminersorneq pillugu inatsit nalilersoqqikkusuppagu taama misissuinissatsinnut aamma piareersimavugut, Mette Frederiksen oqarpoq.
Ataqqinnittut
Ministeriunerlu aalajangiisinnaaguni naalagaaffeqatigiinnerup nutarsarnissaa aamma pingaaruteqarpoq.
Taamaammat Liberal Alliancep Kalaallit Nunaannut oqaaseqartartuata, Carsten Bachip nutarsaaneq nunanut allanut politikkimut aamma tunnganersoq – aamma ministeriunerup nunanut allanut sillimaniarnermullu politikki Kalaallit Nunaannit Savalimmiuniillu oqartussaaffigineqalernissaa ministeriunerup takorloorneraa tusarusuppaa.
Mette Frederiksenilli maannakkut ilusilersorneqarnerata allanngortinneqarnissaa Danmarkimut kissaataanngitsoq erseqqissaatigaa.
- Naalagaaffeqatigiinneq nuannaraarput, kisianni nunanit marlunnit ataaseq allannguerusulluni oqarpa taava akissuteqarnitsinni ataqqinninniarpugut, Mette Frederiksen oqarpoq.
Nunanut allanut naalakkersuisup, Vivian Motzfeldtip (S) nunarput nunanut allanut politikkikkut nammineq aqutsissasoq kissaatigalugu arlaleriarluni oqaatigaa.
Ukiumut milliardit amigaatigineqassasut
Sammisaq alla folketingip ataatsimiittarfiani initusoq tassaavoq peqqinnissaqarfik. Folketingimummi ilaasortap, Inuit Ataqatigiinneersup, Aaja Chemnitzip nunatsinni peqqinnissaqarfik ernumanartoq oqaatigaa.
IA-meersup oqarnera naapertorlugu peqqinnissamik suliaqartut amigaataangaatsiarlutillu sulisunik attassiniarneq pisariaqartinneqarpoq.
Danmarkillu pissutsinik patajaallisaanerunissaa piariaqartinneqarsinnaavoq.
- Nunarput 180 millionit koruuningajannik akiliuteqartarpoq, ilaatigut Region Hovedstadenimut pisisarnermini. Danmark piviusumik akiliinerulaassannginnersoq paasiniarlugu susassaqarfiit taakku ilaatigut misissorneqarsinnaapput. Peqqinnissaq pillugu ataatsimiititaliarsuup nunatsinni peqqinnissaqarfik ukiumut 1 milliardit koruuninik amigaateqartassasoq oqaatigaa, taamaammat tamanna IA-mit ernumassutigineqangaatsiarlunilu ukkatariniarneqarpoq, Aaja Chemnitz oqarpoq.
