Tusagassiortunik katersortitsineq: Vivian Motzfeldtip illersornissamut isumaqatigiissut oqaasertalernerugaa
Vivian Motzfeldtip illersornissamut isumaqatigiissutip ilaatut isumaqatigiissut 14,6 milliardit koruuninik naleqartoq nalunaaqutaq marluk missaani oqaasertalerneruaa.
- Pissusissamisoortooqimmat soorunami uagutsinnut tunngassuteqarmat, aammalu nunarsuarmi pissutsit ullumikkut atuuttut aallaavigalugit isumaqarpunga pingaaruteqartorujussuaq qanittumik killiffinnik ilisimatitsinerit taamatut ammasumik ingerlattarnissaat taanna pingaarutilerujussuusoq, Vivian Motzfeldt tusagassiortunik katersortitsinermi oqarpoq.
Naalakkersuisulli tungaannit oqaasertaliisoqarpallaanngilaq. Taassumali siammasinnerusut oqaluuseriinnarpai, innuttaasulli peqataanissaat qanoq pingaaruteqartiginersoq arlaleriarluni oqaatigaa, nunattami nunamik illersuinissaq annermik nammineerluni kivissagaa isumaqatigiissummi anguniarneqarpoq.
- Qanoq innissaa oqaatigisinnaanngilara, kisianni innuttaasut uani ilaassapput. Nunaqavissut peqataanissaat pingaaruteqarpoq, taanna ilaatigut oqarpoq.
Taassuma uagut illersornissatsinnut tunngasuni isumaqatigiissunni nunatta tusaaneqartarnissaa qanoq pingaaruteqartiginera erseqqissaatigaa. Iligisaqarnissattalu qanoq pingaaruteqartiginera erseqqissaatigalugu.
Aalajangersimasumik akissuteqanngitsoq
Isumaqatigiissummut tunngatillugu qanoq ililluni timitalerniarpisiuk qaqugulu?
- Umiarsuit pingasut (isumaqatigiissut malillugu taarserneqartussaq aaqq.) naammanngitsut soorunami oqaluuseraagut, kisianni upernaamut taarserneqassapput, Vivian Motzfeldt oqarpoq.
KNR tusagassiortunik katersortitsinerup kingorna pilersaarutit pillugit apeqquteqarfigeqqippaa. Vivian Motzfeldtimiilli paasiuminaatsumik akissuteqartoqaqqiinnarpoq.
- Isumaqatigiissut isumaqatigiissutaavoq, taanna naatsumik oqaannarpoq.
Isumaqatigiissut naapertorlugu 14 milliardinit 11 milliardit sakkutooqarnermut atorneqassapput.
Ualeq mannali tusagassiortunik katersortitsinermik aalajangersimasumik saqqummiussisoqanngilaq. Naalakkersuisup danskit isumaqatigiissutaani takusimasaminik oqaatiginneqqiinnarpoq. Taassumalu isumaqatigiissutip ilaanik inissiisoqaqqinnissaa qilanaarinerarpaa.
