Nunatsinni qulimiguulinnik annaassiniarnissamut isumaqatigiissut Illersornissaqarfimmut akisungaatsiartoq
![](/sites/default/files/styles/image_934x467/public/article_images/h225_air_g_9.jpg?itok=DJz5WH6y)
Air Greenlandip Illersornissaqarfimmut isumaqatigiissutaa siorna novembarimi sivitsorneqarpoq.
Air Greenland danskit oqartussaasuisa upalungaarsimasuinut – tassa Search and Rescuemut tassa nunatsinni ujaasinermik annaassiniarnermillu suliaqartunut qulimiguulimmik piareersimatitsissasoq isumaqatigiissummi pineqarpoq.
Air Greenlandip Issittumi Sakkutooqarfik Kalaallit Nunaannilu Politiit qulimigiillit atorlugit 2032 tikillugu ikiorsinnaavai.
Illersornissaqarfiulli Air Greenlandip toqqarnera taama akisutigissasoq naatsorsuutigisimanngikkaluarpaa.
Air Greenlandimmi Illersornissaqarfiullu isumaqatigiissut 2032-mut attatiinnassagunikku 965 millionit koruuninik aningaasartuutaasinnaavoq.
Illersornissaqarfiup missingersuutaa 400 millioniusoq
Nunatsinni annaassiniarnissamut qulimiguullit pillugit isumaqatigiissutinut neqeroorutit assigiinngitsut Illersornissaqarfiup 2018-imi itigartitsissutigai.
Neqeroorutigineqartut ukiunut arfineq-pingasunut 534-t aamma 916 millionit koruunit akornanniinnerat pissutaanerat pillugu itigartitsivoq. Illersornissaqarfilli piffissamut tassunga 400 millionit koruuninik missingersuuteqarpoq, taakkulu agguaqatigiissillugit ukiumut 50 millionit koruuniullutik.
Nittartakkatigut tusagassiorfik Altinget Arktis taama allaaserisaqarpoq.
Illersornissaqarfiup tassunga taarsiullugu Air Greenland isumaqatigiissuteqarfigineqartussatuatut kissaatigisatut toqqarpaa.
Tamannalu Air Greenlandip Issittumi Sakkutooqarfimmut, politiinut danskillu oqartussaasuinut allanut 2021-mit 2025-mut ukiunik pingasunik, pingasunik marlunnillu sivisussuseqartumik pingasoriarlugu sivitsorneqarsinnaasumik annaassiniarnermik qulimiguulissaqartitsinissaanik Illersornissaqarfimmut isumaqatigiissuteqarnermik kinguneqarpoq.
Isumaqatigiissulli katillugu 965 millionit koruuninik naleqartussanngorpoq – tamanna agguaqatigiissillugu ukiumut 80,4 millionit koruuniuvoq, Altinget Arktis taama allaaserisaqarpoq.
Qulimiguullit nutaat atorunnaarsitsisinnaanerlu
Tusagassiorfilli naapertorlugu aningaasat suli annerulersinnaapput.
Air Greenlandillu qulimiguuliutai Airbus H225 aamma Airbus H155-it nutaaviullutillu siusinnerusumit pitsaanerupput. Taakkuninngalu tunniussineq neqerooruteqartunit allanit aalaakkaaneruvoq.
Illersornissaqarfiullu ”sillimaniarneq pissutigalugu” qulimiguulinnik EU-mi neqerooruteqarnissamik taamaatitsiinnarnissaq aalajangerpaa. Tamannalu Kalaallit Nunaanni annaassiniarnermut qulimiguulinnik ingerlatsinertulli Illersornissaqarfimmut akeqassagunartoq, Altinget Arktis allappoq.