Nunatsinni puisinniartarneq Nunanit Avannarlernit tapersersorneqarpoq
Nunatsinni puisit nungusaataanngitsumik piniagaaneri neqaallu nerisarineqartarneri taamatullu amiisa tunisassiarineqartarneri, Sverigemi, Ålandimi, Finlandimi taamatullu europap avannaata kangiani baltiskit nunaanni paasisitsiniaanissamik pilersaaruteqarnermi, Inuit Silap aaqqissuussaa, Nunani avannarlerni ministerit suleqatigiillutik tamanna 500.000 koruuninik taperpaat.
Tusagassiuutinut nalunaarummi aamma allaaserineqarpoq, puisit amiisa EU-mi maanna tuniniarneqartarneri inerteqqutigineqanngikkaluartoq, taamaattoq kalaallit puisittaasa amii tamaani tunisassiarineqarneri unittuuiusassimasoq.
Inuit Silap paasisitsiniaanissaanut tunngatillugu, Namminersorlutik Oqartussat neriuuteqarput, Nunani avannarlermiut, ulluinnarni nersutit amiinik atisaqarnermik taamatullu allatigut amminik atuisarnermik misilittagaqareersut paasisitsiniaanermi pissarsiaqarluarumaartut.
Nunat Avannarliit suleqatiginerinut nukittorsaataassaaq
Nunani Avannarlerni ministerit suleqatiginninnerat atorluarneqarumaartoq, Nunanut Avannarlernut suleqatigiinnerit pillugit Naalakkersuisoq, Doris Jakobsen neriuuteqarpoq.
- Nunarsuatsinnut allanut attaveqarnitta taamatullu puisit pillugit suliap Nunanit Avannarlernit tapersersorneqarnerata takutippaa, politikkikkut suleqatigiinnermi angusat qanoq annertutigineri, Doris Jakobsen oqarpoq.
