Nunatsinni politikerit sulillutik aallartittut

Nunatsinni politikerit qinigaaqqammersut sulinerat ullumi aallartilluarpoq. Inatsisartunimi inissitsiterfiusumik ataatsimiittoqassaaq,  tassa imaappoq politikerit pisortatigoortumik atuutilerput.

Suut tamarmik pilersaarut malillugu ingerlassagunik naalakkersuisut nutaat Inatsisartunit akuerineqassapput. Demokraatinit Jens-Frederik Nielsen oqaluttuarisaanermi aatsaat taama siammasitsigisunut naalakkersuisunut siulittaasunngortussatut innersuunneqarpoq, naalakkersuisoqatigiit tassaassapput Demokraatit, Inuit Ataqatigiit, Siumut Atassullu.

33-nik ukiulik, Jens-Frederik Nielsen Inatsisartunut qinersinermi 4.850-init taaguunneqartoq qinersinermi ajugaasuuvoq.

Tamatuma saniatigut Inatsisartunut siulittaasoqarfimmi pilersitsisoqarlunilu politikerit kikkut ataatsimiititaliani sorlerniissanersut ullumikkut aamma paasissavagut.

Politikerit pisarneq malillugu Annaassisitta Oqaluffiani nalunaaqutaq qulinut aallartittumik naalagiaqatigiipput. Tamatumalu kingorna nalunaaqutaq 11.30 Inatsisartut ataatsimiittarfiannut ingerlaaqatigiillutik.

Demokraanit Jens-Frederik Nielsen naalakkersuisunut siulittaasunngortussatut innersuunneqartoq aamma Naleqqamit Hans Enoksen Inatsisartut ataatsimiittarfiata tungaanut ingerlaartut. Enoksen Inatsisartuni utoqqaanersaavoq, taamaammallu siulliulluni ingerlalluni. Assi © : KNR/Mads Malik Fuglsang Holm

Toqqissisimanissaq oqaluuserisassaniittoq

Politikerit Inatsisartunut isaapput. Sulinerlu nalinginnaasuunngitsoq ersarippoq. Inuimmi tusagassiortullu pisarnermit amerlanerungaatsiarput. KNR-ip ilanngutassiortuata poltiiekritoqqat ilaat Siumumit Erik Jensen naapippaa. Taanna Siumumi oqaluttuarisaanermi aatsaat taama qinigaanikitsigisumi siulittaasooqqammerpoq. Tamatumalu kingunerisaanik Vivian Motzfeldt partiimi siulittaasunngorpoq. Erik Jensenili qinigaaffimmi suleqqinnissaminut suli piareersimavoq.

- Tamat oqartussaaqataanerannut ulloq angisuullunilu pingaaruteqarpoq, taanna oqarpoq, nangillunilu:

- Sulilernissatsinnut inuiaqatigiillu pillugit pisariaqartumik suliaqarnitsinnik nangitsinissamut soorunami qilanaarpugut.

Demokraatinit Anna Wangenheim (saamerleq) peqqinnissamut innarluutilinnullu naalakkersuisutut innersuunneqartoq aamma Siumumit Erik Jensen (talerperleq) Assi © : KNR / Markus Valentin

Pissutsit ilungersunartut nunatta inissisimaffigisaa eqqarsaatigalugu toqqissisimanissaq pingaaruteqartoq, Erik Jensen isumaqarpoq. USA-p nunarput aquttariaqaraa, amerikamiut præsidentiata, Donald Trumpip arlaleriarluni oqaatigaa.

 - Innuttaasut nunanit allanit tatineqangaatsiarneq pissutigalugu toqqissisimanissaq pisariaqartippaat. Tamannalu pissutigalugu suleqatigiittariaqarpugut, Erik Jensen oqarpoq.

Siulittaasumik qinersineq

Politikerit Inatsisartunut siulitaasumik nutaamik taasinissaat tikinneqarpoq. Siumumit ukiorpassuarni poltikeriusoq Kim Kielsen toqqarneqarpoq. Siumumit Lars Peter Poulsen tassunga sinniisussanngortinneqarpoq.

Kim Kielsenip tatiginnittoqarnera qujassuteqarfigaa.

- Maani inersuarmi torersumik ingerlanissarput siulersorneqarnissarpullu ingerlanniarsarissavarput aamma partiit assigiimmik kiinnerfigineqartarnissaat naatsorsuutigineqassaaq, taanna oqarpoq.

Kim Kielsen Inatsisartuni siulittaasunngoqqippoq. Assi © : KNR/Mads Malik Fuglsang Holm

Ukiorpassuarni politikeri Inuit Ataqatigiinneersoq (IA) Mimi Karlsen Inatsisartuni siulittaasup tulliatut toqqarneqarpoq, IA-mit Pipaluk Lynge sinniisussatut toqqarneqarluni.

Partii Naleraq siulittaasumik nutaamik toqqaanermi kisimiilluni toqqaanngilaq.

Kim Kielsen Inatsisartuni 2022-mit 2023-mut aamma siulittaasuuvoq. Taannalu Inatsisartunut 2023-mit qinigaaffiup 2025-mi naanissaata tungaanut siulittaasuusumit, Mimi Karlsenimit taarserneqarluni.

Naalakkersuisut akuerineqartut

Nunatsinni naalakkersuisut nutaat pisortatigoortumik maanna akuerineqarput.

Jens-Frederik Nielsen taamaalilluni naalakkersuisunut pisortatigoortumik akuerineqarpoq. Jens-Frederik Nielsenilu tatigineqarnerminut qujassuteqartoq attortisimasoq malunnarpoq.

- Aatsaat taamak ataatsimoornissamik nunarput pisariaqartitsivoq. Taamaammat qamanngavik nuannaarutigaara taama siammasitsigisumik naalakkersuisoqatigiinnik pilersitsinissaq iluatsissimmmat, Jens-Frederik Nielsen oqaaseqartarfimmit oqarpoq.

Taassuma tamatuma saniatigut naalakkersuisut nutaat saqqummiuppai. Múte B. Egede (IA), Vivian Motzfeldt (S), Nivi Olsen (D), Naaja H. Nathanielsen (IA), Anna Wangenheim (D), Mads Pedersen (IA), Peter Borg (D), Bentiaraq Ottosen (A) aamma Aqqaluaq B. Egede (IA).

Naleraq partiini kisiartaalluni illuatungiliuttup Mads Pedersenip KNR-imi oqallinnermi aaqqissuisooreerluni meeqqanut inuusuttunullu naalakkersuisunngornera isornartorsiorpaa. Mads Pedersen Inatsisartunut qineqqusaarnerup naammassineqarnerani oqallitsitsinermi aallakaatitsisuuvoq. Naleraq naak nunatsinni innuttaasut ikittunnguugaluartut pissaanermik agguataarineq pingaaruteqartoq isumaqarpoq. Taannali akerlerinngilaat.

Inatsisartuni nuannaartoqarlunilu misigissutsit assigiinngitsorpassuusut KNR-ip ilanngutassiortuata ataatsimiittarfimmi najuuttup oqaatigaa. Qungujulasoqarpoq isillu immatsersimallutik. Politikerit akornanni imminnut ikasarfigisoqalaartarpoq. Qineqqusaarneq naammassisimasoq ersarippoq.