Nunatsinni peqquserluttuliortarnermut misissuineq aallartingajalerpoq

Nunatsinni peqquserluttuliortarnerup nunanut allanut sanilliullugu qanoq atuugatiginera siullerpaamik maanna misissorneqartussanngorpoq.
Allattoq Ivik Kristiansen
januaarip 28-at 2016 15:04

- Transparency International peqquserluttuliortarneq pillugu assigiinngitsunik misissuisarpoq, taakkunanilu misissuineq, "Global Corruption Barometer"-imik taaguutilik ilaavoq. Misissuinermi tassani nunat assigiinngitsut innuttaasuisa nunaminni qanoq ileqqorluttoqartigineranik isumaat paasiniaaffigineqartarput.

- Misissuinermi Kalaallit Nunaat siornatigut ilaasimanngilaq, misissuinerulli tulliani ilaassussanngorluni. Misissuinissamut atatillugu oqarasuaatikkut apersuinerit aallartinneqangajalerput, Transparency International Greenlandimi siulittaasup tullia, Jakob Strøm oqarpoq.

Aamma atuaruk Nunarput peqquserluttuliortarneq pillugu nunat tamalaat nalunaarsorsimaffiannut ilanngunneqalersoq

Transparency Internationalip Nunatsinni immikkoortortaqarfia, Transparency International Greenland, Nunatsinni peqquserluttarneq pillugu nammineq arlalinnik misissuisareerpoq.

Alloriarnerujussuaq

Nunalli arlallit misissuinerannut Nunatta ilanngunnera alloriarnerujussuusoq, Transparency International Greenlandimit isumaqartoqarpoq. Tassami nunanit allanit peqquserluttuliortarnerit atugaanerat Nunatsinnilu peqquserluttuliortarnerup atugaanera maanna sanilliunneqarsinnaalissagami.

- Nunanut peqquserluttuliornermik eqqorneqarnerpaanut sanilliullugu Nunatsinni qanoq ileqqorluttoqartiginersoq paasinarsissaaq. Kisianni nunat peqquserluttuliornermik eqqorneqarpianngitsunut, tassa nunat avannarlernut Nunarput sanilliunneqarsinnaassasoq ilimagaarput, Jakob Strøm oqarpoq.

Aamma atuaruk Transparency Greenlandip ilaasortanngornera tatigineqarnerunermik kinguneqassaaq

Misissuinissamullu apersuinerit najoqqutaralugit peqquserluttuliortarnerup qanoq atugaatigineranut naliliisoqarsinnaanngussassoq, Jakob Strøm nassuiaavoq, apeqqutigineqartussallu paasiniaaqqissaartarfimmit suliarineqartut erseqqissarlugu.

- Paasiniaaqqissaartarfik apeqqutinik sanasussaq apersuisussarlu nunanit tamalaanit akuersaarneqarpoq. Nunatsinnilu peqquserluttuliortarneq pillugu innuttaasunit unammillernarsorineqartut apersuinerni paasiniarneqarput, Jakob Strøm oqarpoq nangillunilu.

- Kalaallit Nunaanni innuttaasoq kinaluunniit peqquserluttuliortarneq pillugu paasiniaaqqissaartaffimmit ungasinngitsumi sianerfigineqarsinnaavoq. Nunatsinnilu innuttaasorpassuit tassani ammasumik peqataarusussasut neriuutigaarput, tassami misissuinerup inernissaanut tamaanna sunniuteqartupilussuussammat, Jakob Strøm oqarpoq.

Taanna aamma oqarpoq, inuit 1000-t missaat apersorneqassamaartut, misissuinerlu 2017-ip aallartilaarnerani saqqummiunneqarnissaa naatsorsuutigineqartoq.