Transparency Greenlandip ilaasortanngornera tatigineqarnerunermik kinguneqassaaq
Ajunnginnerusumik suleqatigiilernikkut periarfissat pitsaanerulernissaat, TGI-p siulittaasuata, Anita Hofferip nuannaarutigaa.
- Nunarsuatsinni immikkoortortaqarfiit allat suleqatigilernerini ilikkagassavut naatsorsuutigisatsinnit amerlanerulersussaassapput. Soorlu Asiami naalagaaffiit Kalaallit Nunaannisut inukitsigisut, soorlu Mongolia eqqarsaatigalugu, nunap taassuma suleqatigineqalernera pissarsiaqaatigisinnaallualissavarput.
Transparency Greenlandip siulittaasua, Anita Hoffer oqarpoq.
Nunatsinni Peqquserluttuliornermik akiuiniarnermut suliniaqatigiiffik 2011-mi aallartinneqarmat, Nunatsinni peqquserluttuliornermut qanimut akiuiniartoqalermat aamma peqquserluttuliortoqartannginnissaa pillugu paasisitsiniaanerit aallartinneqarput.
TGI, nunanit allanit suleqateqalernissaq anguniarlugu, Tranparency Internationalimut tamakkiisumik ilaasortanngornissaminik qinnuteqarpoq. Ilaasortanngunnginnermili TGI-p suliniarnera qanimut misissoqqissaaqqaarneqarluni. Tamatumalu kingorna ilaasortatut akuerisaavoq.
Tamatuma kinguneranik, TGI ikiorneqarnissamik pisariaqartitsinini naapertorlugu, Transparency Internationalimit ajornannginnerusumik ikiorserneqarsinnaalerpoq.
- Tranparency Internationalip tutsuiginassusia eqqarsaatigalugu, uagut pisariaqartitsileraangatta aamma qanoq suleriaaseqarnissatsinnik nalornisoortilluta ikiorneqarsinnaanngorpugut tamannalu qujanarpoq, Anita Hoffer oqarpoq.
Tranparency Internationalimut ilaasortanngornermi suliniaqatigiiffiit ataatsimeersuarnerini Kalaallit Nunaat taaseqataasinnaanngorpoq. Taamaalilluni aamma periaasissanik nutaanik ilikkagaqarnissaq qaninnerulerluni.
Ilaasortanngornermili aningaasanik tapiissutisinissaq naatsorsuutigineqassanngitsoq, Anita Hoffer oqarpoq. Taamaattoli suliniuteqarnerni aningaasanik atorfissaqartinneqartunik arlaannut qinnuteqarsinnaanissaq ajornannginnerulersussaassasoq, Anita Hofferip oqaatigaa.
- Siunissaq eqqarsaatigalugu aningaasaliisinnaasunit tatigineqarnerulernissarput ilaasortannguvinnitsigut anguarput, taamaalilluni aningaasanik pissarsiniarnissaq aamma ajornannginnerulersussaassalluni.
Nunatsinni Peqquserluttuliornermik akiuiniarnermut suliniaqatigiiffiup siulittaasua, Anita Hoffer oqarpoq.
Nunarsuatsinni peqquserluttuliortarneq pillugu ataatsimeersuarnermi, aggustimi Malaysiami pisussami, Anita Hoffer peqataassaaq.