Nunarput peqquserluttuliortarneq pillugu nunat tamalaat nalunaarsorsimaffiannut ilanngunneqalersoq

Transparency International Greenland - TIG, taama oqaluttuarpoq, tamatumunngalu peqatigitillugu aamma ilisimatitsissutigaa nunani tamalaani peqquserluttuliortarneq pillugu nalunaarsorsimaffimmut ataqqisaasumut Global Corruption Barometerimut Nunarput aappaagu ilanngunneqassasoq.

Nunat avannarliit nunarsuarmi peqquserluttuliorfiunnginnerpaatut nalunaarsorsimaffimmi inissisimasarput, 2016-imiillu Nunarput aamma tassani nalunaarsorsimalissaaaq.

Peqquserluttuliortarnermik misissuineq oqarasuaatikkut apersuinerit atorlugit ingerlanneqassaaq, Transparency Greenlandillu neriuutigaa misissuinermut atatillugu sianerfigineqartut tamarmik unneqarillutik apeqqutinut akissuteqarumaartut.

AAMMA ATUARUK Suliniaqatigiiffik: Kinaassutsimik isertuussinissaq qulakkeeruminaassaaq

Najoqqutassiamik saqqummersitsisoq

Transparency International Greenland aamma Naalagaaffiit Peqatigiit peqquserluttuliortarnerup akiorniarneqarneranut ullorititaanut atatillugu "Peqquserluttuliortarnerup akiorniarneqarneranut najoqqutassiaq" nutartigaq ippassaq saqqummersippaa.

Najoqqutassiaq suliniaqatigiiffinnut suliffeqarfinnullu sakkussaavoq,  peqquserluttuliornissamut aarlerinaateqarsinnaasut oqallisigineqarnissaannut qanorlu iliuuseqarfiginissaannut assersuutinik tigussaasunik imaqarluni.

TIG isumaqarpoq peqquserluttuliortarneq sutigullu atugaasinnaanera Nunatsinni ukiuni kingullerni eqqumaffigineqarnerulersimasoq.