Politikki

Suliniaqatigiiffik: Kinaassutsimik isertuussinissaq qulakkeeruminaassaaq

Namminersorlutik Oqartussat suliffeqarfiutaanni kinaanermik ersersitsinani ilisimasanik ingerlatitseqqissinnaanissaq, tassa eqqortuusorinngisanik kalerriuteqarsinnaaneq, periarfissaalerpoq, tassalu allaffissornikkut unioqqutitsinermilu qulaajaasoqarsinnaassalluni.

Allattoq Thomas Munk Veirum, Ivik Kristiansen, Charlotte Holten-Møller

decembarip 07-at 2015 04:40

Aaqqissuussarlu taanna Transparency International Greenlandimit nuannaarutigineqarpoq. Nunattali inukissusia pissutigalugu kinaassutsimik isertuussinissaq ajornarsinnaavoq.

- Amerlanngilagut, aalajangiisussallu aamma ikillutik. Inuillu marluk aalajangiisimappata, ataatsillu ilisimasaminik ingerlateqqiilluni, taava kina oqaaseqarsimanersoq aappaata nalunavianngilaa. Tamannalu aarlerinartoqarpoq, ileqqorlunneq akiorniarlugu sulissuteqartup Transparency International Greenlandip siulittaasua Anita Hoffer oqarpoq.

Aamma atuaruk Uldumip peqquserluttoqannginnissaa qulakkeerusuppaa

Taannalu naapertorlugu Nunatsinni ileqqorluttoqartarneranik takussutissaqanngilaq.

- Kalaallit Nunaanni ileqqorluttoqarneranik takussutissaqanngitsoq misissuititsinitta takutippaa. Taamaattoq sammisat ilaanni aarlerinartoqarpoq, Anita Hoffer oqarpoq.

Atorfinitsitsinermi attuumassuteqarpallaarneq, tunissutinik tunisisarneq aamma pisortat ataanni suliassat neqeroorutigineqartarnerisigut periutsini aarlerinartoqarsinnaasoq, Anita Hoffer nassuiaavoq.

Kinaanermillu ersersitsinani ilisimasanik ingerlatitseqqiisoqartassasoq, Transparency International Greenlandimit ilimagineqarpoq.

- Kinaanermik ersersitsinani ilisimasanik ingerlatitseqqissinnaanissamik aaqqissuussamik pilersitsisoqassappat, taanna atorlugu inunnik misigisaminnik oqaluttuarusuttoqassasoq ilimagaarput, Anita Hoffer oqarpoq.