Uldumip peqquserluttoqannginnissaa qulakkeerusuppaa
Aningaasaqarnermut aatsitassanullu naalakkersuisup Anda Uldumip peqquserlunnginnissamut politikki ippassaq marlunngornermi tusagassiortunik katersortitsinermini saqqummiuppaa.
Aatsitassanut ikummatissanullu naalakkersuisoqarfik, Transparancy Greenland naapertorlugu, aatsitassarsiornerup annertusiartornera ilutigalugu peqquserluffiusinnaavoq, tamannalu naalakkersuisup ammasumik ersarissumillu ingerlatsinikkut pinngitsoortikkusuppaa.
Aamma atuaruk Aningaasarsiornikkut ammasuunissaq Anda Uldumip tapersersorpaa
Naalakkersuisoqarfimmi sulisut qanoq iliorlutik peqquserluttutut pasineqarnissaq pinngitsuussaneraat ilitsersorneqassapput. Matumani ilaatigut pineqarput soqutigisanik aporaattoqarsinnaanera, tunissutinut sunulluunniit qujaannartarnissaq aammalu ilaquttanik qanigisanillu salliutitsinnginnissaq
Aatsitassanut ikummatissanullu naalakkersuisoqarfimmi sulisunut aalajangersimasumik malittarisassiortoqassaaq.
Makku inerteqqutigineqassapput:
Suliassap suliarineqarnerani inuttut imaluunniit aningaasaqarnikkut soqutigisaqartuuneq.
Ingerlatseqatigiiffinni Aatsitassanut Ikummatissanullu Naalakkersuisoqarfiup suliassaasa ataanni inissisimasuni aktiaateqarneq.
Ingerlatseqatigiiffimmut pisortaqatigiinni peqataaneq imaluunniit qanittumik attuumassuteqarneq.
Aamma atuaruk Uldum: Siumut kinguneqartitsivoq
Tunissutit tunniussallu govmin.gl-imi tamanut saqqummiunneqartassapput, sulisullu akuersaarneqarsinnaasumik pissusilersortarnissamut ingerlaavartumik kalerrinneqartarlutillu ilinniartinneqartassapput.
Suliniutit assigiinngitsut Namminersorlutik Oqartussat tamakkerlugit eqqunneqarnissaat siunertaavoq, Aatsitassanulli ikummatissanullu naalakkersuisoqarfik matumani aqqutissiuussisuussaaq.
