Nunatsinni nuna allanngutsaaliugaq pisortatigoortumik atserneqarlunilu ammarnersiorneqassaaq
Kalaallit Nunaata kitaani nuna allanngutsaaliugaq ullumikkut ammarnersiorneqassaaq.
Atissaalu unammisitsinikkut toqqarneqarsimasoq aamma saqqummiunneqassalluni.
Sumiiffik 22.000 kvadratkilometerinik annertussusilik Kangerlussuup Qeqertarsuullu Tunuata akornanniittoq Pilivik Nuna allanngutsaaliukkamik ateqalissaaq.
Tamanna pillugu Avatangiisinut, Pinngortitamut, Nukissiuutinut Ilisimatusarnermullu Naalakkersuisoqarfik tusagassiuutinut nalunaarummi allappoq.
- Nunap Allanngutsaaliukkap Piliviup ammarneqarnerani nunatsinni nunamik allanngutsaaliukkamik, nammineerluta pilersitatsinnik siullermik peqalerpugut, avatangiisinut, pinngortitamut, nukissiuutinut ilisimatusarnermullu naalakkersuisoq Jørgen Rosbach tusagassiuutinut nalunaarummi allappoq:
- Tassani pinngortitaq asseqanngitsoq ataatsimoorluta paarissavarput, aamma sumiiffik maanna kinguaariinni inuusuni tulliuttunilu atorneqarsinnaasaattut misigineqarsinnaasaattullu ingerlateqqissavarput.
Nuna allanngutsaaliugaq Kangerlussuup ungasinngisaani Aasivissuit Sermiata eqqaani nal. ataatsip qeqqaniit marlup tungaanut ammarnersiorneqassaaq, tassanilu Qeqqata Kommuniani borgmesteri Malik Berthelsen, Kommune Qeqertalimmi borgmesteri Simigaq Heilmann aamma Jørgen Rosbach oqalugiassapput.
Taassuma kingorna Kangerlussuaq Multihusimi kaffillertoqassaaq.
Piniariartarfik pingaarutilik
Atissaanik juunimi juulimilu unammisitsisoqarpoq, tassani innuttaasut nunap allanngutsaaliukkap aterisinnaasaanik siunnersuuteqarsinnaasimapput.
Ateq Pilivik aalajangiunneqarpoq, taannalu sumiiffiup piliviusarsimanera inuiaqatigiinniillu atorneqartarsimanera aallaavigineqarpoq:
- Tuttunik, umimmannik eqalunnillu qangaaniilli piliviusarsimavoq ullumikkullu aamma piniariarfittut suli atorneqartarluni, Pilivimmik siunnersuuteqartoq allappoq.
Nuna allanngutsaaliugaq Pilivimmik atserneqaraluartoq, sumiiffimmi kangerluit, qaqqat, piniariarfiit allallu aqqi allanngortinneqassanngillat.
- Ateq Pilivik Nunap allanngutsaaliukkap ineriartortinneqarnerani najugaqartut peqataalluarnerannik takutitsivoq, borgmesteri Malik Berthelsen tusagassiuutinut nalunaarummi allappoq:
- Kommunit Nunap allanngutsaaliukkap pilersinneqarnissaanut suliniuteqartuupput, aamma najugaqartut soqutigisaat, misilittagaat ilisimasaallu nunamik allanngutsaaliukkamik suliaqarnermi ilusilersueqataasimapput, tamannalu ingerlaannassaaq.
Piniariarfiuinnassasoq
Pilivik Nuna allanngutsaaliugaq Kommune Qeqertallip Qeqqatalu Kommuniata Wild Nature Foundation peqatigalugu nunamik allanngutsaaliugaqalernissaanik 2020-mili kissaateqarnerannit ineriartortinneqarpoq.
Tassanngaanniit innuttaasunik ataatsimiisitsinerit, ilisimasanik katersinerit tamanullu tusarniaanerit ingerlanneqartarsimapput, nunalu allanngutsaaliugaq EU-mit Grøn Vækstip maannakkut tapersersuineratigut piviusunngortinneqarpoq.
- Ammaanersiorneq kommunit Naalakkersuisullu akornanni ukiuni arlalinnit suleqatigiinnerannik, aamma innuttatta akuutinneqarnerannik nalliuttorsiorfiuvoq, borgmesteri Simigaq Heilmann tusagassiuutinut nalunaarummi allappoq:
- Nuna allanngutsaaliugaq najukkami naleqarnerulersitsissaaq, aamma ataatsimoorluta pinngortitap paarinissaanut, piujuartitsiffiusumillu takornariaqarnerup sumiiffinni ileqquusumik atuinermik ataqqinniffiusumik qulakkeernissaanut qilanaarpugut,
Sumiifferujussuaq allanngutsaaliorneqaleraluartoq kikkulluunniit tassunngarsinnaapput aamma suli piniartoqarsinnaavoq, aalisartoqarsinnaavoq nuniattoqarsinnaallunilu.
Taamaallaat sumiiffinni ataasiakkaani killilersorneqarsimasuni, uumasut sianigisariallit piffissani aalajangersimasuni sianigineqartassapput, soorlu: Qasigissat, nerlerit, qeerlutuut tuttullu.
