ASSIT Nunatsinni nipilersortartut nunanit allanit alaatsinaanneqartut

Tamanna Aarhusimi Godsbanenimi aaqqissussinermi "SPOT on Greenland"-imi pivoq.

Taamatullu aaqqissuussisoqarnissaa ilaatigut nipilersoqatigiinni TV2-mi erinarsortuusup Steffen Brandtip siunnersuutigisimagaa, Aarhusimi SPOT Festivalimi pisortaq, Gunnar Hansen, KNR-imut taama oqarpoq.
 
- Steffen Brandtip sianerfigaanga nipilersortartut inuusuttut SPOT-imut atatillugu isumassarsiatsialaateqartut oqaloqatigeqqullugit. Akivaralu: Inuit silatuut tusaaniartuaannarpugut, taamaammat taamaaliorpunga.

Nipilersortartullu inuusuttut taakku ilagaat Miki Jensen nipilersoqatigiinnit Small Times Giantsimeersoq, taassumalu ukioq manna festivalertoqarnerani kalaallit nipilersortartut immikkut sammineqarnissaat siunnersuutigaa.

- Unnummik immersuisinnaalluartutut nalilerpagut. Nipilersornikkut aammalu pitsaasumik aaqqissuussinissaq eqqarsaatigalugu. Taamaammat misiliinissarput nalornissutigivallaanngilara, Gunnar Madsen taama oqarpoq.

Nunanit allanit soqutiginninneq alliartortoq

Unnuullu Nunatsinni nipilersornikkut suut nuannarineqarnerpaajunerinik takutitsiffiunissaa aamma eqqarsaataasimavoq.

Tusarnaartitsisussat ilagaat rappertartoq "Tarrak", saqqummersitaminik "Tupilak"-mik qanittukkut ilisimaneqarlualersoq.

- Soqutiginninneq alliartortoq malugisinnaavara, Danmarkimeersunik takkuttoqartarpoq oqarlutik: 'Aa, illit tassa taanna!', aamma nunanit allaneersut ornittarpaannga. Imaaratarsinnaavoq kalaallit erinarsugaat nipilersugaallu Frankrigimiut rappertartut soqutigineqarnerisulli soqutigineqalersut. Frankrigimiut rappertartut amerlasoorpassuarnit tusarnaarneqartarput oqaasii paasisinnaanngikkaluarlugit, Josef Tarrak taama oqarpoq.

Kalaallit nipilersortartut internetti iluaqutigigaat

Nipilersortartut, soorlu Simon Lynge, Nivi Nielsen aamma Small Times Giants Nunatta avataani ukiuni kingullerni saqqummilaalersimapput.

Pingaartumillu internetti tamatumunnga pissutaasoq, Jakob Skovaa, nipilersoqatigiinni Small Times Giantsimi bassertuusoq oqaluttuarpoq.

- Nipilersukkanik nammineerluni saqqummersitsisoqarsinnaavoq. Nuusiorfinnut allanullu atasoqartariaqanngilaq. Kikkulluunniit internettikkut saqqummersitsisinnaapput, saqqummersitaallu nunarsuaq tamakkerlugu tusarnaarneqarsinnaallutik. Taamaaliornikkullu sumi tamaani soqutiginnittoqalersinnaasarpoq.

Spot Festival naliliisartunit nuusiorfinnillu ornigarneqartartutut ilisimaneqarpoq. Tamannalu malugineqarsinnaalereersoq, nipilersoqatigiinni Small Time Giantsimi erinarsortuusoq, Miki Jensen, oqaluttuarpoq.

- Nipilersoqatigiimmi arlaliuvugut nunani allani tusarnaartartullit. Maani aamma tamanna malugisinnaasoraara. Schweizimi festivalertitsisartut Norgemilu festivalertitsisartut, katillugit inuit qulit, maanga tusarnaariarniarluta nalunaarfigaatigut. Nipilersoriaatsillu tassaapput hip-hop, rock aamma pop.

Kalaallit Nunaat immikkut sammillugu aaqqissuussinermi nipilersoqatigiit tallimat sisamanngormat unnukkut tusarnaartitsipput, festivalimi sapaatiuppat tungaanut ingerlanneqartussami kalaallit allat aamma tusarnaartitsisussaapput.
 
Aarhusimi Kalaallit Illuutaat aamma Aarhus Kommunei SPOT on Greenlandimik aaqqissuisuupput.