Nunatsinni meeqqat inuusuttullu 30%-ii iPadinik tunineqassapput
"Qeqqata Kommuniani Kommuni Kujallermilu qarasaasiaqarnikkut alloriarnerujussuaq" 2013-imi aasaanerani atuanngiffeqareernerup kingorna Qeqqata Kommuniani pissaaq, tamatumalu malitsigisaanik Kommuni Kujallermi, tassa atuartut ilinniartitsisullu tamarmik internettimut attavilinnik iPadeqalissallutik.
Qeqqata Kommuniani borgmesteri, Hermann Berthelsen, tulluusimaartorujussuuvoq, meeqqallu atuarfiini atuartitsinikkut internettip periarfissaallualernissaa eqqarsaatigalugu ima oqarluni:
- Nunarput nunarsuarmut ilaavoq, internettilu allaanngilaq Kalaallit Nunatsinnut pilersitaq. Atuarfiit massakkut nunarsuarmioqataanikkut ineriartortitsinermi peqataatitsinerulissapput, atuartitsinikkullu nutaaliornissamut aqqutissiuussissallutik. Ilaatigut naatsorsuutigaara atuartuutivut nunat allat oqaasiisigut ilisimasaqarnerulissasut, Hermann Berthelsen oqarpoq.
Kommunit meeqqeriveqarfii aamma iPadinik tunineqassapput, meeqqat mikinerminniilli atualinngikkallarnerminni qarasaasianut tunngasutigut sungiussisimalerniassammata.
Kommuni Kujallermi borgmesterip Jørgen Wæver Johansenip, iPadinik atuilernissap periarfissaliilluarnissaa takusinnaavaa, soorlu assiliivitsigut, nipitigut atuartitsinermilu assitalersuinertigut:
- Meeqqat inuusuttullu - angajoqqaavisa isertitaqassusiat apeqqutaatinnagu, mikineriniilli qarasaasiaqarnikkut periarfissaqalernissaat pisariaqartutigullu ilikkartinnissaat, namminnerlu pisinnaasaqassutsimikkut ilisimasatigullu annertusaanissaat atuisinnaalernissaallu pingaaruteqartuuvoq, tamatumuunami siunissami periarfissaqassusissaat ammaanneqartussaammat, Jørgen Wæver Johansen oqarpoq.
Jens-Jørgen Pedersen, ANINGAASAATEQARFIK VILLUM-imi Nunatsinni, Europallu qeqqani kangianilu aningaasanik agguaassinermi pilersaarutitigut pisortaasup neriuutigaa, pilersaarutip amerlasuut kajumissuseqalersissagai:
- Meeqqat inuusuttullu 30%-iisa peqalernissaat neriuutigivarput, Kalaallit Nunaanni, Danmarkimi nunanilu allani pilersaarummik taama annertutigisumik suli pilersitsiviunngitsuni allanik kajumilersitsissasoq. Tamannami alloriarneruvoq annertooq, nukiillu aamma ilinniartitsisuni, meeqqani angajoqqaanilu ataatsimoortillugit suleqatigiissittariaqarlutik. Pilersaarutimmi qiimmaallaataanissaa, Kalaallit Nunaallu tamakkerlugu kivitseqataalluarnissaa upperivarput, Jens-Jørgen Pedersen, ANINGAASAATEQARFIK VILLUM-imeersoq oqarpoq.
