Nunatsinni internetti sukkanerulingajalersoq

Sisimiut, Maniitsoq Narsarlu sukkanerusumik pitsaanerusumillu internettimut attaveqangajalersut, Tusass nalunaaruteqarpoq.

Ericssonimmi Tusassillu illoqarfinni taakkunani pingasuni 5G atulersinniarpaa, tassa misileraavigeqqaarniarpaat.

Tamanna novembarip aallaqqaataani pissaaq.

Tamatuma kingorna Ilulissat, Nanortalik, Nuuk, Paamiut Qaqortoq, Qeqertarsuaq, Uummannaq, Aasiaat Qasiannguillu tullinnguutissapput.

Ericsson nunarput tamakkerlugu 4G-mik pilersuisooreerpoq.

Modemmit nutaat

Nunani allani kabelit fiberiusut nunamut assanneqarsinnaasarput, tamannali nunatsinni assorsuaq ajornakusoorpoq, taamaammat 5G-mut attaviit aqquteqanngitsuussapput, Tusassimi pisortaq, Kristian Reinert Davidsen oqarpoq.

 - Nunani allani kabelit fiberiusut nunamut assanneqarsinnaasarput, tamannali assorsuaq ajornakusoorpoq, Kalaallillu Nunaanni aningaasaqarnikkut iluanaarfiunani. Taamaattumik Kalaallit Nunaata annersaa nunaalissaaq ledningeqanngitsumik 5G-qarfiusoq, tassa imaappoq Tusassip kabelit fiberoptiskiusut inoqutigiinnut tamanut tallisittariaqarunnaassavai.

- Taamaattorli modemminut piumasaqaatitaqarneruvoq, taamaattumik NETGEAR modeminik nutaanik pitsaasunik niueqatigiinnikkut tunniussinissaanik isumaqatigiissuteqarfigaarput, taamaasilluni sukkassutsit sukkanerit atorlugit sullitat misigisaannik pitsaanerulersitsinissamik qulakkeerinneqataassaaq, Kristian Reinert Davidsen oqarpoq.

Atuisartut akiliutissaat ilisimaneqanngitsoq

5G atuisartunut qanoq akeqassanersoq Tusassip akissuteqarfiginngilaa.

- Tuniniartakkatsinni akisunerpaamit akisunerulaassaaq, pisortaq oqarpoq.

Modemmit nutaat qanoq akeqarnerat aamma oqaatigineqanngilaq.

Tusassip oqarnera naapertorlugu 4G-mit 5G-mut nuunnissaq pisariaqarpoq. Nunatsinnimi internettimik atuisartut amerliartuinnavipput, taakkulu tamarmiullutik pioreersuni ADSL-imik attavinni inissaqanngillat.