Nunatsinni ilisimatusarnerit Danmarkimi sipaarniartoqarneranit eqqugaasinnaasut
Venstrep aningaasanut inatsisissatut siunnersuutaa naapertorlugu GEUS - Naalagaaffiup Danmarkimi Nunatsinnilu Ujarassiornikkut Misissuisoqarfia - 2020-p tungaanut 14,6 millionit koruuninik sipaarniuteqassaaq, 2017-imiinnarlu 7 millionit koruuninik sipaarniuteqassalluni.
Sipaarniuteqarneq Danmarkimi pisortat sullissiviini tamani sipaarniuteqartoqarnissaanik pissuteqarpoq. Aamma GEUS-ip ataani nunarsuarmut siaruarnermut aningaasaliissutaasut Aatsitassallu pillugit Ilisimasarfimmut (MiMa)-mut aningaasaliissutaasut ikilisinneqassapput.
Sipaarniuteqarnerli Nunatsinnut eqquissanngitsut GEUS-imi pisortap tulliata Flemming Getreuer Christiansenip oqaatigaa.
GEUS-immi Namminersorneq pillugu inatsit aamma Danmarkip Nunattalu akornanni isumaqatigiissutit arlallit aqqutigalugit pisussaaffigaa Nunatsinni ilisimatusarnermut aningaasanik aalajangersimasumik amerlassusilinnik atuissalluni. Aningaasat taakku ukioq manna ikinnerpaamik 36 millionit koruuniussapput.
- Suliniutit Aatsitassanut pisortaqarfillu suleqatigiissutigisavut matumani eqqugaassanngillat, Flemming Getreuer Christiansen KNR-imut taama oqarpoq.
Nunatsinni ilisimatusarneq toqqaannanngikkaluartumik sipaarniuteqarfigineqassasoq
Taamaakkaluartoq sipaarniuteqarnerit Nunatsinni nunap iluani pisuussutit pillugit ilisimasanut kingunerlutsitsisinnaapput, GEUS-ip ilisimatusarnikkut suliniutai arlallit Nunatsinnut Danmarkimullu ataatsimut tunngassuteqarmata.
Ilisimatusarnerullu avataanit aningaasalersornissaannut GEUS siunissami ilungersornerusariaqassaaq.
- Suliniutit, assersuutigalugu EU-mit aningaasalersukkat, nalorninartoqarsinnaassasoraakka. Soorlu silap pissusianut tunngatillugu. Aamma suliniutit allat aatsitassanut tunngasut avataanit aningaasalersugaasut pineqarsinnaapput. Aamma nunat avannarliit ataatsimoorullugit suliniutaat pineqarsinnaapput. Taakkuuppullu ernumassuteqarfiginerpaasakka, Flemming Getreuer Christiansen taama oqarpoq.
Pingaarnersiuineq uggornartikkaa
Sipaarniuteqarnerit sutigut ingerlanneqassanersut GEUS-ip siulersuisuisa misissortussanngorpaat.
Nunatsinnilu ilisimatusarneq ilaatigut eqqugaasussaanngikkaluartoq sipaarniuteqartoqartussanngornera pisortap tulliata uggornartippaa.
- Kalaallit Nunaannimi pissutsit pillugit ilisimasanik sapinngisamik amerlanerpaanik maanna pisariaqartitsisoqartillugu taama pisoqalernera uggornartippara. Piiaaveqarnikkummi aatsitassarsiornikkullu ilungersortoqarpoq, taamaammat taakkunani suliat ikinnerulersinneqartariaqassappata uggornassaaq, Flemming Getreuer Christiansen taama oqarpoq.
Naalagaaffiilli Peqatigiit imaanut inatsisitigut oqartussaaneq pillugu isumaqatigiissutaannut atatillugu misissuinernut GEUS ukiuni tulliuttuni, ukiut tamaasa, 1,5 millionit koruuninik aningaasaliiffigeqqinneqartassaaq.
