Nunatsinni geologimi ph.d-mut ilinniarsimasoq siullerpaaq arnaavoq
Nunatsinni geologimi ph.d-mut ilinniarsimasoq siullerpaaq arnaavoq.
Nanortalimmeersoq Majken Poulsen Djurhuus Københavnip Universitetiani ukiuni arfineq-marlunni ilinniareerluni maajimi ilinniarnerminit allagartartaarpoq.
- Nunatsinni arnani siullersaavunga, soorunamilu persuarsiornarpoq nuannaaqaangalu, Majken Djurhuus Poulsen KNR-mut oqarpoq.
Ph-d-mut ilinniarnermini Tasiilap eqqaani rubinisiornermut tunngasumik immikkut misissuivoq - tassa aappaluartumik safirimik - taassuma ujarassiuutut paasilluassagaanni paasiniarsimavaa Tasiilap eqqaani qaqqarrsuit pinngoqqaarneranniit qanoq pisoqarsimanera.
Ilinniartutut najuulluni misissuinermini tamatuma nalerpiaa misissussallugu soqutigilersimavaa.
- Taava periarfissaqalerpunga Tasiilamukarlunga misissuiartornissannut, tamaanimi nalaani safir allaaserineqarnikuunngitsoq piuvoq, uanniillu suliarineqarnissaa akuersissutigineqarpoq, Majken Djurhuus Poulsen oqarpoq.
Mattusimalluni misigisoq
Majken Djurhuus Poulsenip ph.d-liornermini sulinini nuannarigaluarlugu, ilaannikkut mattusimavallaartutut misigisimasarnerarpoq.
- Kalaallit Nunaanni kisimiivillunga sulinera unammillernartoqalaartarpoq, tassami siunnersuisukka tamarmik nunani allaniipput aammalu geologit suleqatikka tamarmik aamma allami ungasissorujussuarmi najugaqarput. Ilaannikkut mattusimasorujussuarmiillunga misigisaqaanga, taamaammallu ilaannikkut inuit allat ornittariaqartarpakka oqaloqatiginiarsarisarlugit apersortarlugillu, tassami tamanna mattusimavallaaraanni pisariaqartarmat, oqaluttuarpoq.
Majken Djurhuus Poulsenip ujarassiornermut tunngasunik soqutigisaqarnera nunatta kujataani peroriartorsimaneranik aallaaveqarpoq.
- Pinngortitamik soqutigisaqartuaannartuuvunga, ujaqqat meeraallungali katersortuaannartarpakka, Nanortalimmi meeraagallarama pisuttuaraangatta umiatsiamilluunniit angalaaraangatta alapernaaserfigiuaannartarpakka, oqarpoq.
Nammineq assilisaq
Nunatsinni qaarsut nuisaannartut
Majken Djurhuus Poulsenip suliluunniit gymnasie naammassinagu geologimut ilinniarnissani aalajangiutereerpaa.
Ilinniakkamut tassunga ingerlallualerumaarnissani takorloorsimanngilluinnaraluarpaa, taannami toraagarinngikkaluaramiuk. Ilisimatuulli atuarfiannut pulaarnermi kingorna suut tamarmik mumipput.
- Gymnasiemi atuareernerma kingorna ilisimatuut atuarfiat Diskomiittoq pulaarpara, tassaniipput biologit geologillu. Oqaluttuaallu assorujussuaq tiguartiffigaakka, taamaalillungalu puttarsilluartutut ippoq meeraallungali ujarassiornermut tunngasunik soqutigisaqartuaannarsimanera, Majken Djurhuus Poulsen oqaluttuarpoq.
Taassuma inuusuttut kalaallit allat kaammattorusuppai nammineq aqqutimisut geologimilu ilinniarsimasamisut ingerlaveqaqqullugit, tamannami Kalaallit Nunaanni ilinniagarissallugu tulluarlunilu iluaqusiissagaluaqimmat.
- Geologi pissanganarluinnartuuvoq, nunatsinni qaarsortat ersiinnarput, ujarassiornermullu tunngasumik sammisaqalaarsimagaanni atuagassarpassuaqarpoq, angallammut ilaalluniluunniit umiartulaaraanni paasisassarpassuaqarnartarpoq, Majken Djurhuus Poulsen.
Taanna maanna De Nationale Geologiske Undersøgelser for Danmark og Grønland (GEUS)-mi atorfeqarpoq.
Maannakkorpiarlu nunani tamalaani saqqummertussanik ujarassiornermut tunngasunik allaatigisanik allaleruttorpoq. Taamaalioreerunilu nunattta kujataani avannaanilu sumiiffimmi najuulluni suliaqartussaavoq.
