Nunatsinni filmilianut ukioq nalinginnaanngitsoq: Oscarimik, Robertimik Bodilimillu nersornaaseqarnissamut innersuussaqartoq

Ukioq manna nunatsinni filmilianut iluatsitsilluarfioqaaq.

Nunatsinnimi filmiliat filmiliortartut silarsuaanni ataqqisaasunik nersornaaserneqarnissamut innersuunneqartut pingasorsuupput.

Filmi naatsuliaq, Ivalu, nunat tamalaat akornanni filmiliatsialattut Oscarimik, aamma piviusulersaarut, Tsumu - Hvor går du hen med dine drømme, danskit filminut nersornaasiuttagaannik Bodilimik taavalu piviusulersaarut, Siunissaq, Robertimik nersornaaserneqarnissamut innersuunneqarput.

Nersornaaserneqarnissamullu innersuunneqarnerat qiimmatsaatigineqaqaaq. Nunatsinni filmiliortartoq, Pipaluk Kreutzmann Jørgensen, filmiliortartoq Danmarkimeersoq, Anders Walter, ilitsersuisoralugu Ivalumik filmiliornermi ilitsersuisooqataasoq, qiimmatsattunut ilaavoq. 

- Tupinnaqaaq. Oscarimik nersornaaserneqarnissamut taamaalluta innersuunneqarnissarput neriuutigiuaannarnikuuarput, takorluugarpullu piviusunngormat nuanneqaaq, Pipaluk Kreutzmann Jørgensen KNR-imut oqarpoq.

Aataavissuaq innersuussisoqartoq

Filmiliamik nunatsinni filmiliortartunit suliarinneqataaffigineqartumik nunat tamalaat akornanni filmitsialannut nersornaasiuttakkamik ataqqisaaqisumik Oscarimik nersornaaserneqarnissamut aatsaavissuaq innersuussisoqarpoq.

Ivalumi danskit filmiliaraat, nunatsinnili filmiliortartoq isiginnaagassiortarfimmik Polarama Greenladimik piginneqataasuusoq, Pipaluk Kreutzmann Jørgensen, Ivalumik filmiliornermi ilitsersuisooqataavoq.

Taamaammat filmip naatsup, Ivalup, Oscarimik nersornaaserneqarnissamut innersuunneqarnera Pipaluk Kreutzmann Jørgensenimut nunatsinnilumi filmiliortartut silarsuaannut isumaqaqaaq.

- Suleqatigiilluavissorpugut, nunatsinnimi filmiliortartut suleqataanerat peqqutaaqataarpiarluni. Taamaammat nersornaaserneqarnissamut innersuunneqarnera isumalerujussuuvoq. Soqutigineqarluartumimmi namminerluinnaq filimiliortalernissatsinnut aallartinissaataannaavoq, Piplauk Kreuzmann Jørgensen oqarpoq.

Allanik periarfissaqarluarnerulertitsisut

Nunatsinni filmiliat nersornaaserneqarnissamut innersuunneqarnerisa allanik periarfissaqarluarnerulertitsinissaat, nunatsinni filmiliortartut kattuffiata Film.gl-ip siulittaasuata, Klaus Georg Hansenip qilanaaraa.

- Kalaallit Nunaata filmiliornerup silarsuaani nittarsaanneqarnera soorunami nuannaarutigeqaarput. Nuannerluinnarpoq, taanna oqarpoq.

- Flimit taakku pingasut nersornaaserneqarnissamut innersuunneqarnerat Kalaallit Nunaanni filmiliat Kalaallit Nunaalluunniit pillugu filmiliat qularnanngitsumik maluginiarneqarnerulernerannik kinguneqassaaq.

AAMMA ATUARUK Nunarput Hollywoodimi: Ivalu Oscarinnannissamut qanilliallattoq

Filmit taakku nersornaaserneqarnissamut innersuunneqartut danskinit filmiliaammata, Klaus Georg Hansenip Kalaallit Nunaat pillugu filmiliatut taavai.

Nunatsinnili filmiliortartunik isiginnaartitsisartunillu allamiut filmiliaanni aatsaat taama suleqataasoqartigimmat filmi taanna aamma nutaaliorfiusoq, taanna erseqqissaavoq.

- Kalaallit Nunaanni filmiliortartut taamaalillutik namminerluinnaq filmiliornissamik periarfissaqarluarnerulissapput, taanna oqarpoq.

Filmillu taakku nersornaaserneqarnissamut innersuunneqarnerat nunatsinni kulturilerinermik sulialinnut aamma isumaqaqisoq, Nunatta Isiginnaartitsisarfiata pisortaa Susanne Andreassen isumaqarpoq.

- Isiginnaagassiortartuusugut suliaqarnerulernissatsinnut ammaasipput. Namminerluinnaq filmiliornissamik periarfissaqarnerulertitsipput. Nunanik tamalaanik suleqateqarnerulertitsissapput. Kalaallit Nunaat kulturilerinermik eqqumiitsuliornermillu suliallit silarsuaanni nittarsaanneqarluarpoq, tamannalu nuannaarutissaaqaaq, Susanne Andreassen oqarpoq.

Filmiliornermut instituteqalernissaa kissaatitigaat

Filmit taakku pingasut nersornaaserneqarnissamut innersuunneqarnerat filmiliornermut nunatsinni instituteqalernissaanik politikeritta pingaartitsinerulernerannik kinguneqassasoq, Pipaluk Kreutzmann Jørgensen, Klaus Georg Hansen Susanne Andreassenilu neriuutigaat. 

Filmiliornermimmi suliallit tamanna sivisuumik kissaatigaat.

Tamannalu Inatsisartut upernaaru ataatsimiinnerminni oqaluuserisussaavaat.

- Kalaallit Nunaat pillugu filmiliat iluatsitsilluarataarneranni ineriartortitseqqinnissamut ajoraluartumik aningaasassaalatsillutalu atortussaalatsivugut. Ineriartortitseqqissinnaanissatsinnullu filmiliornermut instituteqartariaqaraluarpugut, Klaus Georg Hansen oqarpoq.

AAMMA ATUARUK Kalaallit pillugit piviusulersaarut Bodilimik nersornaaserneqartussatut innersuunneqartoq

Isiginnaartitsisarfiup pisortaata kalaallit isiginnaagassiaanut aningaasaliisoqarnerunissaa aamma kissaatigaa.

Taassuma filmiliornermik suliaqarneq ineriartupallassoraa - isiginnaartitsiartullu filmiliortartullu tamanna tulluusimaarutigisinnaavaat.

- Tamanna uninngaannarlutik angunngilaat.

- Poltikerit taakkununnga malinnaasariaqarput, sammisarlu ukkatarinerullugu. Eqqumiitsuliorneq kutlruilu avammut tunisassiaapput. Oqaluttuamilu uani kikkuunerluta, qanoq oqaluttuassartaqarnerput pillugu kivitseqataavugut, Susanne Andreassen oqarpoq.

Filmiliornermilu maanna siuariarluarnissamut piffissaasoq, Pipaluk Kreutzmann Jørgensen isumaqarpoq.

- Ammavoq, taamaammat periarfissaq atorluassavarput.