Kalaallit pillugit piviusulersaarut Bodilimik nersornaaserneqartussatut innersuunneqartoq
![](/sites/default/files/styles/image_934x467/public/article_images/ny_kasper.jpg?itok=MKPGhfHt)
Kalaallit pillugit filmi piviusulersaarut, Tsumu - Hvor går du hen med dine drømme?, filmini piviusulersaarusiani pitsaanerpaatut Bodilimik nersornaaserneqartussatut innersuunneqarpoq. Taassuminngalu piviusulersaarusiorluni filmiliortup, Kasper Kiertznerip, tamanna nuannaarutigaa.
- Nuanneqaaq. Tulluusimaarnaqaaq, nersornaaserneqartussatullu innersuunneqarnera pitsaagineqarneranik ersersitsineruvoq. Piviusulersaarusiaralu taanna uannut aamma isumalerujussuuvoq, tassanilu sapeeqalutik peqataasut Tasiilameersut, Lars, Eino Thomasilu, peqqutaapput, taanna oqarpoq.
AAMMA ATUARUK Dokumentar om unge i Tasiilaq: Næste generation skal ikke opleve det, vi har oplevet
Piviusulersaarut taanna Tasiilami inuusuttut ilaata, Eino Taunajiup taassumalu kammalaataata Larsip Thomasillu tamarmik immikkut takorluugaannut assigiinngitsunut tunngasuuvoq.
Ingammik Eino Larsilu piviusulersaarusiami tassani malinnaaffigineqarsinnaapput, taakkulu marluullutik Tasiilamiit nuullutik ilinnialernissartik takorluugaraat.
Marluullutilli Tasiilami suliniutitik angisuut qimaannassanerlugit aamma isumaliutigisariaqartarpaat.
Takorluugaat neriuutaallu ukkatarigai
Piviusulersaarusiami pingaarnertut inuttat, Eino, Lars Thomasilu, Tsumup piviusunngortinneranut piviusulersaarusiallu taassuma nersornaasiuttakkamik ataqqisaasumik Bodilimik nersornaaserneqarnissaanut innersuunneqarneranut peqqutaaqataalluinnartuusut, Kasper Kiertzer erseqqissaavoq.
- Sapeeqaaq, aamma filminik naliliisartorpassuarnit pikkorissunit torrallaanerarneqarlutik maligassiuisuunerarneqarlutillu nersorniarneqarnerat inissimaniilluinnarpoq, taanna oqarpoq.
Pingaarnertut inuttat ilaat, Eino Taunajik, piviusulersaarut Tsumu illoqarfinnut assigiinngitsunut sisamanut takutikkiartorlugulu oqaluttuariartorlugu januaarip 25-ata februaarillu arfineq-pingajuata akornanni angalassaaq.
Eino Taunajiup illoqarfiit tikitassai ukuupput: Qaqortoq, Sisimiut, Aasiaat Ilulissallu.
TSUMU DR TV-kkut massakkorpiaq isiginnaarneqarsinnaavoq.
Taassuma inuusuttunik qiimmannartunik isumassarsisitsisartunik artorsarfeqartaraluarlutillu takorluukkaminnik piviusunngortitsinissamik tamviaaruteqartunik takorusuttut Tsumumik isiginnaarnissaannut kajumissaarpai.
- Inuit qaqutigoortut filmimi tassani ilaapput: Lars, Thomas Einolu. Aatsaallu taama nukittutigisunik, sapiitsigisunik, nutaaliorsinnaatigisunik, takorluuinertutigisunik, pissanganartigisunik immikkuullaritsigisunillu siornatigut naapitsinikuunngilanga.
- Piviusulersaarusiamik filmiliorninni tatiginnillutik peqataammata qujamasuutigeqaara, Kasper Kiertzner naggasiivoq.
Bodilimik nersornaasiinerit Københavnimi marsip 25-ani pissapput.