Nunatsinni Danmarkimilu ministerit: Pituffimmi kiffartuussinissaq pillugu isumaqatigiissut suliffissaqartitsiniarnermik qulakkeerinnissaaq

Kalaallit Nunaata nunanut allanut tunngasunut naalakkersuisuata, Danmarkillu nunanut allanut tunngasunut ministerertaavata Pituffimmik kiffartuussinissamut isumaqatigiissut nutaaq nuannaarutigaat.
Pituffimmik kiffartuussinissamik isumaqatigiissut nutaaq suliffissaqartitsiniarnermut iluaqutaassasoq, ilinniarnernmullu atatillugu praktikkertoqarsinnaalernissaanut periarfissiissasoq, Lars Løkke Rasmussen isumaqarpoq. Assi © : Scanpix
Allattoq Ritzau
decembarip 17-at 2022 18:41

Kalaallit suliffeqarfiata Inuksuk A/S-ip Pituffimmik kiffartuussisalernissaanut nutaarsiassaq nuannaarutissaavoq.

Nunanut allanut tunngasunut naalakkersuisoq Vivian Motzfeldt Sermitsiaq.AG-mut taama oqarpoq.

- Angusap aamma takutippaa USA-p, Danmarkip Kalaallillu Nunaata akunnerminni qanimut ataqqeqatigiillunilu suleqatigiinnerat angusaqartitsisinnaasoq, tamatsinnut naammagisimaarnartumik. Tamanna nuannaarutigaarput, Vivian Motzfeldt oqarpoq.

Ilinniarnermut atatillugu praktikkertoqarsinnaanissaa taassuma neriuutigaa, nunatsinneersunillu sulisoqarsinnaanissaa kissaatigalugu.

Suliffissaqartitsiniarnermi periarfissiissasoq

USA-mi illersornissaqarfiup Pituffimmik piorsaalluni aningaasaliingaatsiarniartoq ullumi siusinnerusukkut saqqummiunneqarpoq.

Kiffartuussinissamik isumaqatigiissutip ukiunik aqqaneq-marlunnut atuuttussap 3,95 milliardit dollarinik, tassa 27,7 milliardit koruunit missaannik Inuksuk A/S-imut naleqarnissaa naatsorsuutigineqarpoq.

Danmarkip Kalaallit Nunaatalu Pituffimmik kiffartuussinissamik isumaqatigiissut 2014-imeersoq amerikamiunut tunniunneqarmat iluarinagu oqaatigereeraat, isumaqatigiissut nutaaq atsiorneqarpoq.

USA-p, Danmarkip Kalaallit Nunaatalu kiffartuussinissaq pillugu 2020-mi isumaqatigiissusiornerat naammassineqarpoq, danskillu kalaallillu suliffeqarfiat kiffartuussinissamik isumaqatigiissusiorfigineqarsinnaalerluni.

Lars Løkke Rasmussenip isumaqatigiissut aamma nuannnaraa

Danmarkip nunanut allanut tunngasunut ministerertaavata Lars Løkke Rasmussenip, Pituffimmik kiffartuussinissamut isumaqatigiissut nutaaq nuannaarutigaa:

- USA-p sakkutooqarnikkut najuunnerata Kalaallit Nunaannut kalaallinullu sapinngisamik annertuumik iluaquteqarnissaa isumaqatigiinniarnerni ukunani qulakkeerniarneqarpoq. Isumaqarpungalu isumaqatigiissutigineqartut tamanna takutikkaat, Lars Løkke Rasmussen nutaarsiassaqartitsivimmut Ritzauimut allakkakkut akissuteqarpoq.

Pituffimmik kiffartuussinissamik isumaqatigiissutip nutaap suliffissaqartitsiniarnermut iluaqutaanissaa taassuma neriuutigaa, soorlu aamma ilinniarnermut atatillugu praktikkertoqarsinnaalernissaanut ammaassisinnnaasoq oqaatigigaa.

Inuksuk A/S nunatsinni suliffeqarfiuvoq, Pituffimmilu aserfallatsaaliuineq ukiuni tulliuttuni aqqaneq-marlunni ingerlattussanngorlugu.
Inuksuk A/S Permagreen Greenlandimit 51 procentimik pigineqarpoq, 49 procentialu Vectrus Services Greenlandimit pigineqarluni.