Nunatsinni allamiunik immikkoortitsisoqassanngilaq
Inatsisartuni ilaasortaasimasoq, Isak Hammond, Inuit Ataqatigiit tusagassiutinut nalunaarumminni allappoq, kamak akerartuinerlu akaareqatigiinnissamik ujartuinermi aqqutissaanngitsut, taamaattoqarpallu tamanna akuerineqassanngitsoq allalluni.
Isak Hammond allakkamini nangilluni Randi Brobergimut ima allappoq, issuuaaneq aallartippoq.
'Nunarput Nunarsuarmioqataalereersoq, Kalaalerlu Nunarsuarmi sumiluunniit najungaqarusuffimmini najungaqarsinnaalereersoq, oqallinnermut allamiuluarnermut akuersaartuunersi ersersipparsi', issiuaaneq naavoq.Isak Hammondip uani pivai Partii Inuit akuersaartuunerarlugit.
Radioaviisimi tusarnaartartutta ilaasa, Morten Møllerip, politikki pillugu oqaaseqartartoq, Daniel Thorleifsen aperaa, Randi Broberg isummaminik sakkortuunik annisseqqusaanngippat, kikkut taamaaliorsinnaatitaassanersut apeqquserlugu.
Oqaasilerineq, Atuakkialerineq aamma Tusagssiuutilerineq pillugit cand.stud. Margrethe Thårup Andersen aamma oqallinnermut qisuariarluni allappoq, Inatsisartunut ilaasortat, Naaja Nathanielsen aamma Randi Broberg piumaffigalugit, maligassiuillutik illuinnaasiunngitsumillu inuiannik avissaartuutsitsinerunngitsumik torersumik piviusorlu tamakkiisoq aallaavigalugu oqallinnissaannik aallartitsinissaannik.
Margrethe Thårup Andersen nangilluni allappoq, tamatta ikioqatigiinnissarput, paaseqatigiinnissarput akaareqatigiinnissarpullu aaqqiissutissatut aallaaviusariaqaraluarmata.