Nunatsinni akissarsiutigalugu unamminermi siullerpaami Frank Madsen ajugaavoq
Akissarsiutigalugu tilluuttartoq Frank Mads nunatsinni inunngortoq, Nuummi timersortarfimmi GothåbHallenimi tilluunnermik unamminermi Fight Nithtimi ippassaq unnukkut ajugaammat nuannannersuaqarpoq.
Tilluulluni unamminermi immikkoortuni arfinilinni tamarmik minutsinik pingasunik sivisussuseqartuni immikkoortuni kingullerni marlunni Frank Madsen unammisaminut rumæniamiumut Octavian Gratiimut ilungersungaatsiarpoq.
Taamaattumik unammineq naammassimmat Frank Madsen nuannaarpoq qasullunilu.
- Pikkusuttorujussuuvunga qujanarujussuaq
- Unammisara sakkortoorujussuuvoq , massakkut anersaartorpiarsinnaanngilanga, ilisarisimasanik nalunngisanik ilaquttanillu isiginnaartoqarluni pikkunarpoq. Assut. Tapersersorneqarluarpunga tamassinnut qujanarujussuaq – Frank Mads unammineq naammassimmat taama oqarpoq.
Tilluunnermi isiginnaariartorpassuarnit Frank Madsenip tapersersorluarneqarnini nuannaarutigaa.
- Nukissannik tunineqarpunga naggatissaalu tikillugu ajugaanissaannut. Taamaattumik nukissaqarluarlunga unammivunga qujanarujussuaq Frank Madsen oqarpoq.
Frank Madsenip tilluunnermi unammisaata rumæniamiup Nuummi timersortarfimmi GodthåbHallenini isiginnaartut tapersersuilluarnerat maluginiarpaa.
Tilluuttartut taakkua marluk aatsaat unammilinngillat.
Frank Madsen siusinnerusukkut tilluulluni unamminermi Octavia Gratiimut ajugaanikuuvoq.
Tilluulluni unamminermi akissarsiutigalugu tilluuttartutut unamminnginneranni akissarsiutiginagu tilluuttartut amatørit arlaqartut unammipput.
