Nunatsinneersut Arctic Circle Racemi ajugaasut

Sisimiunilu ulluni makkunani pisoqaqimmat Sisimiuniiginnarallassaagut.

Sisoraaserluni nunarsuarmi oqilaniunnerit sakkortunersaat ilaat Arctic Circle Race ulluni pingasuni unammiuaarfioreerluni ullumi sapaammi naammassivoq ajugaasullu suuarutigineqarlutik.

Ujakkaartartut katillugit 180-it isorartussutsini assigiinngitsuni marlunni ingerlaarsinnaapput, tassa 160 kilometerit imaluunniit 100 kilometerit ingerlaarfigisinnaallugit. Ujakkaartartut tallimanngornermi ullaap tungaani aallarput.

Peqataasorpassuillu isorartussutsit ingerlaarfigisassatik ingerlaarfigereerlugit ullumi sapaammi apuupput.

Nunatsinneersullu angutini arnanilu 160 kilometeritut isorartutigisumi ukioq manna ajugaapput.

Ujakkaartartoq Martin Møller angutini ajugaavoq, sisoraaserlunilu ooqattaasartartoq Ukaleq Slettemark, arnat ujakkaarneranni ajugaasuulluni.

Anders Brink Nyberg, Danmarkimeersoq, normu 2-tut inissippoq, Bjarne Herbert Hansen, nunatsinneersoq 3-nngorluni.

Christina Natalie Kompf, Danmarkimeersoq arnani normu 2-tut inissippoq, Mathilde Le Moullecilu, Norgemeersoq 3-nngorluni.

Arctic Circle race 25-ssaa aaqqissuunneqarpoq.