VM-imut anngunniunneq: Nunat uku Nuummukassasut

Arnat assammik arsarnermi nunarsuarmi pissartanngorniunnissamut, VM-imut atatillugu Nuummi Inussivimmi juunimi anngunniutissapput.

Pilersaarusiornerullu naggataa maanna ingerlaarpoq, tamanna pissutigalugu NACHC-p (National America and Caribbean Handball Confederation) nunat sorliit Nuummi unammissanersut kiisami saqqummiussinnaalerpai.

Ukuuppullu USA, Canada, Mexico, Cuba Kalaallit Nunaallu.

Kalaallit Nunaanni Timersoqatigiit assammik arsartartut kattuffiat tusagassiuutinut nalunaarummi taama allappoq.

Nunat tamarmik imminnut unammissapput, nunanillu peqataasunit tallimanit sisamat semifinalissapput. Unammineq siulleq Inussivimmi juunip tallimaani ingerlanneqassaaq.

Piareersaanerit kingulliit

TAAK-ip oqarnera naapertorlugu kingulliit inissinnissaannut suliaqangaatsiartoqassaaq. Assartuinerit, unammiffissat, ineqarfissat ilaatigut piareersarneqarlutillu nammineq kajumissutsiminnik suliaqataasussarsiortoqassaaq.

- Qilanaarpugut aaqqissuisussatut qujamasullutalu kajumissutsiminnik ikiuutilereersunut aammalu ikiuuttussanut, minnerunngitsumillu qujangaarluta aningaasaliisunnut, TAAK-ip siulittaasuata tullersortaa tusagassiuutinut nalunaaruteqarpoq.

Nunat tallimat assammik arsarnermi VM-ertoqarnissaanut anngunniutissapput.

Nunatsinni arnat assammik arsarnermi nunanut allanut unammisartut aatsaat siullermeerlutik nunatsinni anngunniutissapput.

Danmark, Norge Sverigelu 2023-mi novembarip 30-anit decembarip 17-ianut VM-ertoqarnerani aaqqissuisuussapput.