Nunat inoqqaavi pillugit piviusulersaarusiaq nalaatsornerinnarmik pilersitaasoq

Aaju Peter piviusulersaarusiaalluarnerpaatut Robertimik nersornaasigassatut innersuussami, Twice Colonizedimi, pingaarnertut inuttaavoq. 

Taassuma Issittumi nunat inoqqaavisa pisinnaatitaaffiinik sorsuuteqartuunera piviusulersaarusiami tassani oqaluttuarineqarpoq. Piviusulersaarusiaq taanna ukiuni arfineq-marlunni suliaavoq.

Twice Colonized nalaatsornerinnarmik pilersikkitsik, piviusulersaarusiortoq Linn Alluna oqarpoq.

- Aajup Københavnimi aqquserngit ilaanni takoratarnerani alutoringaarakku kaffisoqatiseraara.

- Kaffisoqatigiinnitsinni misigisalikkersaarfigimmanga killitsissuaarpunga, misigivungalu atuartuullunga ilikkakkakka salluusut. Tassalu misigisaminik oqaluttuukkaminga oqaluttuareqqiisussanngorlunga akisussaaffileraanga misigisimavunga.

Siunertaat ersarilluartoq

Taamaammat piviusulersaarusiaq taanna Aaju Piitap misigisaanik aallaaveqarluinnassasoq isumaqatigiipput, filmillu taassuma inuit assigiinngitsunik tunuliaqutallit akornanni oqallisaanissaa suleqatigiileramilli siunertaraat.

- Piviusulersaarusiatsinnik isiginnaarsimasut oqaluttuarisaanitsinni pisimasunik siunissarissaarnerunissatsinnullu sutigut suliniuteqarsinnaanitsinnik oqalliseqatigiilissasut neriuutigeqaarput.

- Oqaluttuarisaanerput maanna killiffitsinnut aallaaviusoq oqallisigissallugu pingaaqaaq, siunissarissaarnerunissatsinnullu aamma qanoq iliuuseqartariaqarluinnarpugut.

Taamaammat piviusulersaarusiamik Robertimik nersornaasigassatut innersuussaanera suliaanik suli isiginnaarsimanngitsut isiginnaarsimasullumi Aaju Piitap oqaluttuaanik isumassarsitinneqarnissaat aamma neriuutigigini, Linn Alluna aamma oqarpoq.

Piviusulersaarusiartilli nunat inoqqaavisa EU-mi oqalliseqataasalernerannik taakkualu atugaasa pitsaanerulernerannik kinguneqartumik politikerinit aamma arajutsisimaneqassanngitsoq, taassuma aamma neriuutigilluinnarpaa.

Piviusut neriuutillu oqimaaqatigiissaraat

- Piviusut nuanninngitsut Aajullu sorsuutigilluinnagaata akiorluinnagaatalu oqimaaqatigiissumik takutinniaatigalugit kikkulluunniit suminngaanneernersut apeqqutaanani mumisitseqataasinnaanermik neriuuteqalersitsisussamik misigisimalersitsisussamillu piviusulersaarusiorniarneq oqitsuinnaanngilaq.

Aaju Peter nuannaartorilluinnarini, piviusulersaarusiortup aamma isertuutinngilaa.

- Misigisalikkersaarutai isumassarsivigisorujussuuakka, neriuppunga isiginnaartut uattulli aamma isumassarsivigisimassagaat. Taamaammat nersornaasigassatut innersuussaanera isiginnaarneqarusulerneranik kinguneqassasoq neriuppunga.

Twice Colonizedimillu piviusulersaarusiortut Robertimik nersornaasigassatut toqqagaassagaluarunik unnuaruullugu nuannataarutigiumaaritsik qularinngilluinnarpaat.

- Filmiliortummi silarsuaanni nersornaasigassatut innersuussaanerput immini angeqimmat, nersornaasigaanngikkaluaruttaluunniit nuannatissaagut.

- Filmiliortullu silarsuaanni suli pitsaanerusumik naammassisaqarusuffiujuartumi iluatsitsilluarnerit malunnartinnissaat pingaarluinnarpoq, piviusulersaarusiortoq usorsisimaarpaloqaluni oqarpoq.

Piviusulersaarusiaq taanna nersornaasigaanersoq Robertimik februaarip ulluisa pingajuanni agguaanermi nalunarumaanngilaq.