Politikki Avatangiisit Nunanit allanit

Nunat G7-imiittut nunarsuarmi imartat ataatsimeersuarnerminni immikkut samminiaraat

Nunat aningaasarsiorfiusut annerit arfineq-marluk, G7-imik taaneqartartut siuttuisa nunarsuatsinni pingaarutillit ukiut tamaasa ataatsimiissutigisarpaat.

Allattoq Marianne Stenbæk, Montreal, Canada

maajip 29-at 2018 10:28

Nutserisoq Ivik Kristiansen

Nunat G7-imiittut ukioq manna Canadami junip aallartilaarnerani ataatsimiissapput. Nunarsuarmi imartat, issittumi imartat ilaallutik, pingaarnertut ataatsimiissutigineqassapput. Nunat G7-imiittut ataatsimiinnissaannut piareersaatitut Issittumi piujuaannartitsineq imartallu pillugit Montrealimi sapaatit akunnerata siuliani ataatsimiittoqarpoq.

Ataatsimiinnermi siulittaasoq, Chad Gaffield, ataatsimiinnermik aallarniilluni oqarpoq, Issittumi imartat nunarsuaq tamaat sunnertarmassuk, aamma nunanut Issittumi imartanut ungasittunut pingaaruteqartut.

AAMMA ATUARUK Merkel G7-ikkut ataatsimeereerneranni: Tatigeqatigiissinnaajunnaariartorpugut

Canadap generalguvernøriata, Julie Payettetip, ataatsimiinnermi peqataasup, Canadallu avataarsualiartartuinut ilaasimasup, avataarsuarmiinnermini imartat, aamma Issittumiittut, isigisimallugit oqaluttuaraa.

Nunarsuatsinni inuuneq imermik imarmillu pinngitsuuisinnaanngimmat, Issittumi imartat inuit inooriaasaannut, avatangiisimut politikkikkullu tamatsinnut pingaaruteqartoq, generalguvernøri oqarpoq.

AAMMA ATUARUK G7-kkut Parisimi isumaqatigiissut pillugu isumaqatigiinngitsut

Taamaammat imartatta ataasinnaanissaannut ikioqatigiilluta suleqatigiittariaqartugut, Juliette Payette oqarpoq.

Nunat G7-imiittut junip ulluisa arfineq-pingajuannit qulingituaata tungaanut ataatsimiinneranni imartanut oqallinnerit nanginneqassapput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.