Nunat assigiinngitsut innuttaasutik Sudanimit qimagussoraat
Sudanimi sakkuaannerit pissutaallutik nunat arlallit innuttaasutik nunamit tassannga qimagussorpaat.
Nunat killiit assigiinngitsut iliuuseqariinngikkunik maanna iliuuseqaleruttorput.
Norgemiut atorfilittaat Sudanimit qimagussorneqareersut, Norgep nunanut allanut tunngasunut ministereqarfiata sapaammi ualikkut nalunaarutigaa.
Tuluit atorfilittaasa ilaqutaasalu Sudanimit qimagussorneqarsimasut, Tuluit Nunaanni ministeriunerup Rishi Sunakip Twitterikkut ullumi siusinnerusukkut allaaseraa.
Innuttaasunik qimagussuineq ajornakusooraluarluni sukkasuumik naammassineqartoq Sunakip oqaatigaa.
Inuit hunnorujulikkuutaat Sudanimi sakkutuut, pikitsitsisullu RSF-imeersut akornanni sakkuaannerni toqutaasimapput, allallu tuusintilikkuutaat aqqunartitersimallutik.
Tyskisut innuttaassusillit Tysklandip sakkutuuinit qimagussorneqaleruttortut Tysklandip illersornissaqarfiata nalunaarutigaa.
Sakkutuut 150-it innuttaasunik qimagussuinermi ikiuisussat Sudaniliartinneqarnissaat Sverigemi inatsisartuni Riksdagenimi amerlanerussuteqartut sapaammi akuersissutigaat.
USA-p aallartitaqarfiani sulisut USA-mit unnuaq qimagussorneqarput, Frankrigillu sapaammi nalunaarutigaa Frankrigip atorfilittai qimagussorneqaleruttortut.
Sudanimi sakkutuujunngitsut nunami tassani aqutsisuulissanersut aqutsisuulissannginnersulluunniit pillugu ilaatigut isumaqatigiinngittoqarnera pissutaalluni Sudanimi eqqissiviilliortoqalerpoq.
/ritzau/