Nunarsuarmi aalisarnermi nittarsaassinerit annersaasa ilaannik aaqqissuussisut Nuummi matunik ullumi ammaasut

Nunani tamalaanit nittarsaassineq aalisarnermik, piniarnermut nutaaliornermillu sammisaqarfiusoq Nuummiippoq.

Aaqqissuussinerlu ArcticExpo Inussivimmi ullumi aallartinneqarpoq, ullunilu pingasuni tulliuttuni pisussarpassuaqarpoq.

Saqqummiisussat, inuussutissarsiornermeersut aalajangiisartullu aalisarnermik piniarnermullu suliaqarnermut soqutigisaqartut tusindilikkuutaat timersortarfimmi nalunaaqutaq qulinut katersuupput.

Taakku inunnik suliaqarfinnit allaneersunik oqaloqateqariartorlutik nittarsaassiffiusunut alakkarteriniarlutik minnerunngitsumillu saqqummiinernut oqallitsitsinernullu tusarnaariarlutik takkupput.

Nittarsaassisorpassuit – 50-init amerlanerusut – nunatsinnit, Savalimmiunit, Islandimit Danmarkimiillu suliffeqarfinnit, aningaaserivimmit, sillimmasiisarfinnit oqartussaniillu peqataasuupput.

Saqqummersitsivinniittut aamma assigiinngitsorujussuupput.

Aalisarnermi maskiinanik, qoorortuunik, ningittakkanik, qarsorsanik aamma pujortuleeqqanik, aquuteralannik, ingerlaarfissanut najoqqutanut atortorissaarutinik aamma atortorissaarutinik nutaaliaasunik nioqquteqartuupput.

Timersortarfiup isuani issiaviit patitsittakkat arlallit inississorneqarsimapput.

Tassani inuussutissarsiornerup siunissaa pillugu pingaaruteqartut aamma kalaallit kulturiannut qanimut attuumassuteqartut pillugit saqqummiinerit  oqallinnerillu aaqqissuunneqassapput.

Suliffeqarfinneersut najukkameersullu atassuteqalersissagai

Nittarsaassinermi soqutigisaqartut assigiinngitsut attaqaqatigiinnermut, inuussutissarsiutip siunissaanik oqallinnermut minnerunngitsumillu nioqqutissanik nutaaliaasunik teknologiinillu nutaanik tuniniaanissamut ilikkagaqarnissamullu katersuutsinnissaat siunertaavoq.

Kommuneqarfik Sermersooq peqatigalugu nittarsaassinermik aaqqissuussisumi, Aalborg Kongres & Kultur Centerimi niuernermut pisortaq, Lars Rønnov oqarpoq.

- Nuummi suliffeqarfippassuit naapinnissamut katersuunnissamut aamma suliffeqarfiit akimorlugit oqaloqatigiinnissamut periarfissaqarput, oqaloqatigiinnissallu uku pingaaruteqartut isumaqarpunga.

Aalborg Kongres & Kultur Center nittarsaassinermik PolarExpomik Ilulissani ukioq manna oktobarimi qulissaannik aaqqissuunneqartussamik kiisalu nunarsuarmi aalisarnermik nittarsaassinerit annerpaartaasa ilaannik DanFish Internationalimik Aalborgimi aaqqissuussisuuvoq.

Lars Rønnovip oqarnera naapertorlugu illoqarfiit pingaarnersaanni kalaallit inuiaqatigiinni immikkoortoq allarluinnaq angusinnaavaat.

- Nuummi niuerfimmi aalisarnermik inuussutissarsiornermut tunngasut amerlanerusut takusinnaavarput, taamaammat Kommuneqarfik Sermersuup nittarsaassinermik matumani eqimattanut nittarsaassisarnitsinnit allanit allaanerusunut sammisumik aaqqissuusseqatiginera nuannaarutigaarput.

Inuussutissarsiut nunatsinnut pingaaruteqarluinnartoq

Borgmesterip, Avaaraq S. Olsenip (IA) aalisarnermik inuussutissarsiuteqarnerup nunatta siunissaanut innuttaasuinullu pingaassusaa ammaanermi oqalugiarami erseqqissaatigaa.

Aalisartut piniartullu aalisarnermik nittarsaassisoqarnissaa kommunimut noqqaassutigiuartarsimagaat, KNR-ip radiokkut aallakaatitassiaanut oqaatigaa.

Taamaammat aaqqissuussisoqarnera nuannaarutigingaatsiarlugu oqaatigaa.

Nittarsaassineq Kalaallit Nunaannut pingaaruteqartoq, Lars Rønnovip oqaatigaa, tassami nittarsaassineq innuttaasunut nunanit tamalaaneersunit peqataasorpassuarnik naapitsillutik nunatsinni aalisarnermi ilungersunartunik ukkatarinninnerunissamut periarfissaavoq.

- Qassutaarsiutit imaluunniit suugaluartorluunniit pineqarsinnaapput. Nittarsaassisussarpassuillu tamakku pillugit oqaloqatiginnikkiartortut maaniipput, taanna oqarpoq.

Nittarsaassinermi oqaloqatigiinneq aaqqissuisut oqarnerat naapertorlugu aningaasaliinerit suleqatigiinnerillu ineriartornermik aamma suliffissanik siunissami qanoq qulakkeerisinnaanerannut tunngassuteqassasoq, nittarsaassineq pillugu atuagassiami peqataasut tamarmik isernerminni pissarsiarisaanni allassimavoq.

Inuussutissarsiummi suliaqartoqarnerulernissaanut, pingaartumik nunanit allaneersunit kommunimut aamma periarfissiivoq – tamannalu nunatsinnut tamarmut inuussutissarsiummik ineriartortitsinermut aamma tapersiissutaassalluni.

Avammut nioqquteqarnerujussuaq

Nunatta aningaasaqarnerani aalisarnermik inuussutissarsiuteqarneq pingaaruteqarluinnarpoq.

Kulturikkut kingornussaannaanngilaq. Tamanna inuiaqatigiinni assigiinngitsutigut tunngaviuvoq.

 Nunatta avammut nioqqutaasa 98 procenti aalisakkanik qalerualinnillu nioqqutaapput. Taakkua aningaasarsiornerup annersaanik pilersitsisuupput nalilinnillu pilersitsinernik tamanik sunniisuullutik, assartornermi, tunisassiornermi, aalisarnermi avammullu tunioraanermi suliffissaqartitsillutik.   

inuussutissarsiutaallunilu, nunatta tamakkiisup ineriartornerani inoqarfiillu ineriartornerannut sammivissiilluni.

Taamaammat Nuummi nittarsaassinermut aamma soqutiginnittoqangaatsiartoq aaqqissuussisut oqaatigaat.

Nittarsaassinermi inissat qaammatip ataatsip missaata matuma siorna nungupput, aaqqissuisullu peqataasut tusindilippassuit Ilulissani nittarsaassinermi peqataasunit amerlanerusoraat.

Pisortallu timersortarfissuup oqaloqatigiittorpassuaqalernissaa, takkussuuttut atortorissaarutinik qimerluualaarnissaat, atortussaarnianik attavinitsiternissaat aaqqissuussamullu tunngaviusuusumik  oqaloqatigiittoqalernissaa qilanaaraa.  

Taamatut 2027-mi nittarsaassisoqaqqissaaq, taannali pereerpat tullissai ukioq allortarlugu pisassapput, Ilulissaniittartorlu PolarExpo parlakaajaatilissallutik, nunatsinni aalisarnermik piniarnermillu ukkassiffiusumik ukiut tamaasa nittarsaassisoqartassalluni.